O‘zbekiston va Oʻmon o‘rtasida mahalliy kontent va davlat xaridlari sohasidagi hamkorlik istiqbollari muhokama qilindi
2026-11-16 10:10:00 / Yangiliklar

➡️Uchrashuvda ikki mamlakat o‘rtasida sanoat kooperatsiyasini rivojlantirish, davlat xaridlari tizimini takomillashtirish hamda mahalliy ishlab chiqaruvchilarni qo‘llab-quvvatlash yo‘nalishlarida hamkorlikni kengaytirish masalalari muhokama qilindi.
Xususan, mahalliy kontent ulushini oshirish, davlat xaridlarida mahalliy ishlab chiqaruvchilar ishtirokini kengaytirish, ilg‘or tajribalar almashish va ikki tashkilot o‘rtasida institutsional hamkorlikni yo‘lga qo‘yish istiqbollari ko‘rib chiqildi.
Shuningdek, PTLCA bilan imzolanishi rejalashtirilgan o‘zaro anglashuv memorandumi, hamkorlikning ustuvor yo‘nalishlarini belgilash hamda Agentlik faoliyatiga xalqaro ekspertlarni jalb etish masalalariga alohida e’tibor qaratildi.
Uchrashuv yakunida tomonlar belgilangan yo‘nalishlar bo‘yicha amaliy hamkorlikni rivojlantirish va o‘zaro tajriba almashishni davom ettirishga tayyor ekanliklarini bildirdi.
Shu kuni Agentlik direktori O‘zbekiston–Oʻmon biznes-forumi hamda mamlakatimizning iqtisodiy, investitsiyaviy va sanoat salohiyatiga bag‘ishlangan ko‘rgazmada ham ishtirok etdi. Tadbirlar ikki mamlakatning yirik kompaniyalari va ishbilarmon doiralaridan 150 nafardan ortiq vakilni bir maydonda jamladi.
Forum doirasida o‘zaro savdoni kengaytirish, investitsiyalarni jalb etish va sanoat kooperatsiyasini rivojlantirish imkoniyatlari muhokama qilindi. B2B va G2B formatidagi uchrashuvlar o‘tkazilib, energetika, sanoat, transport va logistika, moliya, qishloq xo‘jaligi hamda texnologiyalar yo‘nalishlarida qator hujjatlar imzolandi.



