🏛️ Agentlikda davlat xaridlari masalalari bo‘yicha ochiq muloqot o‘tkazildi
2026-10-17 10:50:00 / Yangiliklar
Unda Agentlik rahbariyati va mutaxassislari, xarid operatorlari hamda “O‘zbekekspertiza” AJ vakillari, shuningdek, tadbirkorlar ishtirok etdi. Agentlik binosida 20 nafarga yaqin ishtirokchi bevosita qatnashgan bo‘lsa, YouTube orqali tashkil etilgan jonli efirni 50 nafarga yaqin tadbirkor kuzatib bordi.
🎤 Muloqot davomida davlat xaridlarida ishtirok etish tartibi, elektron xarid tizimlaridan foydalanish, xarid jarayonlaridagi yangiliklar va amaldagi mexanizmlar, mahsulotlarni sertifikatlash hamda xaridlarda talab etiladigan hujjatlar bilan bog‘liq masalalar muhokama qilindi.
Shuningdek, tadbirkorlar davlat xaridlarida ishtirok etish jarayonida duch kelayotgan muammolar, buyurtmachilar talablari, mahsulotlarning muvofiqligini tasdiqlash va sertifikat olish bilan bog‘liq savollarini bildirdilar. Ko‘tarilgan masalalar yuzasidan tegishli mutaxassislar tomonidan tushuntirishlar berilib, muammolarni hal etish bo‘yicha takliflar ko‘rib chiqildi.
✔️Ochiq muloqotning muhim jihati — tadbirkorlar o‘z muammo va takliflarini bevosita Agentlik rahbariga yetkazish imkoniyatiga ega bo‘ldi. Bu davlat xaridlari tizimida uchrayotgan muammolarni o‘rganish, ularning yechimlarini ishlab chiqish va tadbirkorlar bilan to‘g‘ridan-to‘g‘ri muloqotni kuchaytirishga xizmat qiladi.
📌Bunday ochiq muloqotlar endi har shanba kuni soat 10:00 da doimiy ravishda o‘tkaziladi.
Davlat xaridlari bo‘yicha savol, muammo yoki taklifingiz bo‘lsa, ochiq muloqotda ishtirok etish uchun oldindan ro‘yxatdan o‘ting.
🔗Ro‘yxatdan o‘tish: https://forms.gle/jovyK4aSkCK7zEGW6