“O‘zbekiston – barchamiz uchun yagona Vatan” mavzusida davra suhbati o‘tkazildi
2025-09-26 10:50:00 / Yangiliklar
Davra suhbatini Qo‘mita raisi Qahramon Sariyev ochib, millatlararo totuvlik, bag‘rikenglik va yoshlarni Vatanga sadoqat ruhida tarbiyalashning dolzarbligini ta’kidladi. So‘zga chiqqanlar milliy madaniy markazlar va do‘stlik jamiyatlari o‘rtasida tajriba almashish, yosh avlodni milliy va umuminsoniy qadriyatlarga hurmat ruhida tarbiyalash hamda xorijiy davlatlar bilan madaniy-ma’rifiy aloqalarni kengaytirish masalalari haqida fikr bildirdilar.
Tadbirda yaqinda foydalanishga topshirilgan milliy madaniy markazlar pavilyonlarining ahamiyati alohida qayd etildi. Bu inshootlar turli millatlarning urf-odatlari, madaniyati va an’analarini yosh avlodga yetkazishda muhim o‘rin tutayotgani ta’kidlandi.
Qo‘mita raisi o‘rinbosari Bekzod Shukurovning so‘zlariga ko‘ra, davra suhbatining asosiy maqsadi – O‘zbekistonning yagona Vatan sifatidagi birlik va birdamligini targ‘ib qilish, milliy madaniy markazlar va do‘stlik jamiyatlari o‘rtasida samarali hamkorlikni kuchaytirishdir.
Davra suhbatida barcha ishtirokchilar millatlararo totuvlikni mustahkamlash, yosh avlodni umuminsoniy qadriyatlarga hurmat ruhida tarbiyalash davlat siyosatining ustuvor yo‘nalishlaridan biri ekanini ta’kidladilar. Tadbir va pavilonlarning faoliyati bu boradagi ishlarni yanada samarali qilmoqda.