“O‘zbekiston – 2030” Strategiyasi ijrosida NNT tashabbuslarini qo‘llab-quvvatlashga bag‘ishlangan tadbir bo‘lib o‘tdi
2025-09-15 11:45:00 / Yangiliklar
O‘zbekiston Respublikasi Prezidenti huzuridagi Davlat siyosati va boshqaruvi akademiyasida nodavlat notijorat tashkilotlari (NNT) rahbarlarini qayta tayyorlash va ularning malakasini oshirish kurslari doirasida “O‘zbekiston – 2030” Strategiyasini 2025-yilda amalga oshirish dasturi ijrosini ta’minlashda NNT tashabbuslarini qo‘llab-quvvatlash” mavzusida tadbir o‘tkazildi.
Tadbirda davlat organlari, parlament vakillari, Adliya vazirligi rahbariyati, jamoat fondlari va fuqarolik jamiyati institutlari vakillari, shuningdek NNT rahbarlari ishtirok etdi.
Ishtirokchilar NNTlarning mamlakat taraqqiyotidagi o‘rni, ijtimoiy muammolarni hal etishdagi ahamiyati, davlat tomonidan ular uchun yaratilayotgan shart-sharoitlar xususida fikr almashdilar.
Tadbir davomida O‘zbekiston Respublikasi Millatlararo munosabatlar va xorijdagi vatandoshlar masalalari bo‘yicha qo‘mitasi hamda O‘zbekiston nodavlat notijorat tashkilotlari milliy assotsiatsiyasi o‘rtasida hamkorlik memorandumi imzolandi. Ushbu hujjat fuqarolik jamiyatini rivojlantirishda hamkorlik aloqalarini yangi bosqichga olib chiqishga xizmat qiladi.
Ta’kidlanganidek, bugungi kunda mamlakatimizda qariyb 10 mingta NNT faoliyat yuritmoqda. Ular fuqarolik jamiyatining muhim institutlari sifatida:
-
mamlakat taraqqiyotiga hissa qo‘shmoqda,
-
aholining ijtimoiy ehtiyojlarini qondirishga yordam bermoqda,
-
joylardagi muammolarni hal etishda faol ishtirok etmoqda.
Davlat siyosatida ham fuqarolik jamiyatini rivojlantirish ustuvor yo‘nalish sifatida belgilangan bo‘lib, NNTlar uchun qulay shart-sharoitlar yaratishga alohida e’tibor qaratilmoqda.