Milliy madaniy markazlar Yangi yil bayramini ko‘tarinki ruhda nishonlashmoqda
2025-12-29 15:35:00 / Yangiliklar
Xususan, Toshkent shahar boshqird milliy madaniy markazi tomonidan o‘tkazilgan Yangi yil bayram tadbiri keng jamoatchilik e’tiborini tortdi. Tadbirda markazning 7 yoshdan 70 yoshgacha bo‘lgan faollari, ijodiy jamoalar hamda mehmonlar ishtirok etdi. Bayram dasturida milliy kuy-qo‘shiqlar, raqslar, bolalar chiqishlari va teatrlashtirilgan sahna ko‘rinishlari namoyish etildi.
Tadbir davomida Yangi yil bayramining ahamiyati, jamiyatda birdamlik va o‘zaro hurmatni mustahkamlashdagi o‘rni alohida ta’kidlandi. Ishtirokchilar Yangi yilni turli avlod vakillarini birlashtiruvchi, mehr-oqibat va ezgu niyatlarni mustahkamlovchi umumxalq bayrami sifatida qarshi oldilar.
Shuningdek, O‘zbekiston ozarbayjon milliy madaniy markazi tomonidan ham Yangi yil bayram tadbiri tashkil etildi. Unda markaz faollari, yoshlar va ijodkorlar ishtirok etib, ozarbayjon xalqining madaniy an’analari asosida sahnalashtirilgan badiiy chiqishlar taqdim etildi. Bayram dasturi doirasida musiqiy chiqishlar, milliy raqslar va bolalar uchun mo‘ljallangan bayramona sahnalar namoyish etildi.
Mazkur tadbirlar mamlakatimizda millatlararo totuvlik, bag‘rikenglik va madaniy xilma-xillikni mustahkamlashga xizmat qilmoqda. Yangi yil bayrami turli millat va elat vakillarini umumiy qadriyatlar atrofida birlashtiruvchi muhim ijtimoiy-madaniy hodisa sifatida o‘tkazilmoqda.
Ta’kidlash joizki, O‘zbekistonda faoliyat yuritayotgan milliy madaniy markazlar jamiyatda do‘stlik va hamjihatlik muhitini mustahkamlash, yosh avlodni millatlararo hurmat ruhida tarbiyalashga munosib hissa qo‘shib kelmoqda. Yangi yil munosabati bilan o‘tkazilayotgan bunday tadbirlar esa ushbu ezgu maqsadlarning amaliy ifodasidir.