O‘zbekiston Respublikasi Millatlararo munosabatlar va xorijdagi vatandoshlar masalalari bo‘yicha qo‘mitasi

Film syujeti Marjoniyning bolalik yillari, ta’lim olishi hamda Buxoro va Samarqanddagi ilmiy muhitda kamol topishi bilan bog‘liq voqealarni qamrab oladi. Suratga olish ishlari tarixiy muhitni saqlab qolgan Buxorodagi qadimiy madrasalardan birida boshlanishi rejalashtirilgan.

Loyiha ijodkorlarining ta’kidlashicha, “Ustoz” filmi Markaziy Osiyo va Volga bo‘yi xalqlari o‘rtasidagi ilmiy-ma’rifiy aloqalarning tarixiy ildizlarini ochib berishga qaratilgan. Marjoniy siymosi orqali XIX asr musulmon Sharqida ilm-fan, tafakkur va madaniyatning o‘zaro uyg‘unligi yoritiladi.

Shig‘abutdin Marjoniy (1818–1889) islom ilmlari, falsafa, tarix va pedagogika sohalarida chuqur iz qoldirgan mutafakkir sifatida tanilgan. Uning Buxoro va Samarqanddagi tahsili butun hayoti davomida shakllangan dunyoqarashi va ilmiy qarashlarida muhim rol o‘ynagan. Film aynan shu davrni badiiy va tarixiy asosda ochib berishni maqsad qilgan.

Suratga olish jarayonida O‘zbekistonning tarixiy obidalari, madrasalar va qadimiy shahar manzaralaridan keng foydalanilishi rejalashtirilmoqda. Bu esa filmning vizual jihatdan boy va tarixiy ishonchli bo‘lishini ta’minlaydi. Loyihada ikki mamlakat ijodiy guruhlari, tarixchi-maslahatchilar va san’at sohasi mutaxassislari ishtirok etmoqda.

Film ijodiy jamoasi vakillarining fikricha, “Ustoz” nafaqat tarixiy-biografik kartina, balki bugungi yosh avlod uchun ilmga intilish, ustozga hurmat va ma’naviy kamolot g‘oyalarini targ‘ib qiluvchi asar bo‘ladi. Lenta keng xalqaro auditoriyaga mo‘ljallangan.

Ma’lumotlarga ko‘ra, “Ustoz” filmi premyerasi 2026-yilda rejalashtirilgan. Kartina O‘zbekiston va Tatariston o‘rtasidagi madaniy-gumanitar hamkorlikni mustahkamlash, umumiy tarixiy merosni keng targ‘ib qilishga xizmat qilishi kutilmoqda.