Toshkentda “Xalqlar onalari mushtarakligi: Alla festivali” bo‘lib o‘tdi
2025-12-18 18:10:00 / Yangiliklar
Festival O‘zbekiston Respublikasi Oila va xotin-qizlar qo‘mitasi hamda Millatlararo munosabatlar va xorijdagi vatandoshlar masalalari bo‘yicha qo‘mitasi hamkorligida tashkil etildi. Tadbir Prezidentimizning 2025-yil 19-martdagi PF–52-son Farmonida belgilangan vazifalar ijrosini ta’minlash, umummilliy birdamlikni mustahkamlash hamda ko‘p millatli jamiyatda oila institutining ijtimoiy-ma’naviy ahamiyatini keng targ‘ib etishga xizmat qildi.
Festival doirasida alla aytish san’ati orqali bolaga milliy ruh va mehr-oqibat singdirish, onalarning farzand tarbiyasidagi beqiyos o‘rni alohida e’tirof etildi. O‘zbek, qozoq, tatar, turkman, tojik, koreys va boshqa millatlarga mansub onalar tomonidan ijro etilgan allalar har bir xalqning urf-odati va oilaviy an’analarini o‘zida mujassam etdi.
— Alla — bu nafaqat qo‘shiq, balki avloddan avlodga o‘tib kelayotgan tarbiya va mehr maktabidir, — deya ta’kidlandi tadbir davomida bildirilgan fikrlarda.
Festivalning amaliy qismida bolani parvarishlash, beshikka solish, yo‘rgaklash hamda ona suti bilan oziqlantirish bo‘yicha mahorat darslari tashkil etildi. Ushbu mashg‘ulotlar yosh onalar va kelajakdagi oilalar uchun foydali tavsiyalar bilan boyitildi.
Festival yakunida ishtirokchilar diplom va esdalik sovg‘alari bilan taqdirlandi. Tadbir umumiy alla sadolari ostida, turli millat vakillari bir sahnada jam bo‘lgan holda yakunlandi. “Xalqlar onalari mushtarakligi: Alla festivali” ona, oila va millatlararo totuvlikni birlashtirgan muhim madaniy-ma’rifiy loyiha sifatida e’tirof etildi.