BAAdagi vatandoshlar bilan ochiq muloqot: doimiy aloqalar yangi bosqichga chiqmoqda
2025-12-13 10:05:00 / Yangiliklar
Mazkur uchrashuv O‘zbekiston Respublikasi Prezidentining 2025-yil 19-martdagi “Umummilliy totuvlik va xorijdagi vatandoshlar bilan aloqalarni mustahkamlashni yangi bosqichga olib chiqishga oid chora-tadbirlar to‘g‘risida”gi PF–52-son Farmoni hamda PQ–115-son qarori ijrosi doirasida o‘tkazildi. Ushbu hujjatlar xorijdagi vatandoshlar bilan doimiy muloqotni yo‘lga qo‘yish, ularning huquq va qonuniy manfaatlarini himoya qilish mexanizmlarini tubdan takomillashtirishga qaratilgan.
Davra suhbatida O‘zbekiston Respublikasi Millatlararo munosabatlar va xorijdagi vatandoshlar masalalari bo‘yicha qo‘mitasi raisi Kaxramon Sariyev so‘zga chiqib, Yangi O‘zbekistonda amalga oshirilayotgan keng ko‘lamli islohotlar, iqtisodiy o‘sish sur’atlari va vatandoshlar uchun yaratilayotgan yangi imkoniyatlar haqida batafsil ma’lumot berdi. Uning ta’kidlashicha, Prezident Shavkat Mirziyoyev tashabbusi bilan xorijdagi vatandoshlarni qo‘llab-quvvatlash davlat siyosatining ustuvor yo‘nalishiga aylangan.
Uchrashuv davomida mamlakatimizda millatlararo totuvlikni mustahkamlash, xorijiy davlatlar bilan do‘stona aloqalarni rivojlantirish, demokratik islohotlarning izchil amalga oshirilishi, shuningdek, O‘zbekistonda biznes va investitsiya faoliyati uchun yaratilgan qulay shart-sharoitlar yuzasidan atroflicha axborot berildi. Vatandoshlar tomonidan investitsiya loyihalarini amalga oshirish, innovatsion tashabbuslarni qo‘llab-quvvatlashga doir qator takliflar bildirildi.
Shuningdek, PF–52-son Farmonida belgilangan vazifalar doirasida xorijdagi vatandoshlar bilan hamkorlikni kuchaytirishga qaratilgan “Uz Global Think”, “Who Is Who”, BMT Taraqqiyot dasturining TOKTEN — “Xorijdagi vatandoshlar orqali bilimlarni transfer qilish” loyihasi, shuningdek, xorijiy oliy ta’lim muassasalarini tamomlab, chet elda mehnat qilayotgan yurtdoshlarni birlashtiruvchi “O‘zbekistonlik bitiruvchilar” platformasi haqida batafsil ma’lumot berildi.
Tadbir yakunida ishtirokchilar bunday uchrashuvlar vatandoshlar bilan aloqalarni mustahkamlash, ularning bilim va salohiyatini Vatan taraqqiyotiga yo‘naltirishda muhim ahamiyat kasb etishini ta’kidladilar.