Toshkentda O‘zbekiston va Tatariston OAV vakillari o‘rtasida ochiq media-dialog o‘tkaziladi
2025-11-13 16:40:00 / Yangiliklar
Maqsad – ochiqlik va hamkorlikni kengaytirish
“Ziyo Forum” jamg‘armasi tashabbusi bilan tashkil etilayotgan uchrashuvda O‘zbekiston va Tatariston OAV vakillari, taniqli blogerlar, yosh jurnalistlar, shuningdek, axborot sohasi mutaxassislari ishtirok etishi kutilmoqda. Tadbirda jurnalistika va ijtimoiy tarmoqlardagi zamonaviy tendensiyalar, ommaviy axborot vositalarining yoshlar hayotidagi o‘rni, media-etika hamda xalqaro axborot almashinuvi mavzulari muhokama qilinadi.
Bu kabi uchrashuvlar O‘zbekiston va Tatariston o‘rtasida nafaqat madaniy, balki axborot aloqalarini ham mustahkamlashga xizmat qiladi. Yosh jurnalistlar uchun bu – yangi g‘oyalar va xalqaro tarmoq yaratish imkoniyatidir.
Ochiq muloqot formati – yangi avlod jurnalistlari uchun maydon
Tadbir ochiq muloqot formatida o‘tadi: ishtirokchilar Tatariston va O‘zbekiston OAV vakillariga o‘zlarini qiziqtirgan savollarni berish, media-tajriba almashish va yangi hamkorlik tashabbuslarini ilgari surish imkoniyatiga ega bo‘ladilar.
Ishtirok etish istagida bo‘lganlar uchun tadbirga kirish bepul, biroq oldindan ro‘yxatdan o‘tish talab etiladi. Ro‘yxatdan o‘tish shakli shu havola orqali taqdim etilgan.
📅 Sana: 14-noyabr
⏰ Vaqt: 11:00
📍 Manzil: Toshkent shahri, Kushbegi ko‘chasi, 8
💸 Kirish: Bepul
🌐 Joylashuv: Yandex xaritada ko‘rish
Hamkorlik istiqbollari
Ochiq media-dialog natijalariga ko‘ra, tomonlar O‘zbekiston va Tatariston o‘rtasida jurnalistika sohasida qo‘shma loyihalar, yoshlar almashuvi va axborot sohasida treninglar tashkil etish masalalarini muhokama qilishi rejalashtirilgan.
Tadbir tashkilotchilarining fikricha, bunday uchrashuvlar ikki mintaqa OAV o‘rtasidagi o‘zaro ishonch va do‘stona aloqalarni yanada mustahkamlab, yosh jurnalistlar uchun xalqaro hamkorlikning yangi eshiklarini ochadi.