G‘uzor tumanining olis qishlog‘ida zamonaviy tibbiyot maskani foydalanishga topshirildi
2025-08-31 15:10:00 / Yangiliklar
Mamlakatimiz mustaqilligining 34 yilligi arafasida G‘uzor tumanida aholi salomatligi yo‘lida yana bir muhim qadam tashlandi.
Prezidentimizning 2024 yil 24 dekabrdagi “2025 — 2027 yillarda O‘zbekiston Respublikasining ijtimoiy va ishlab chiqarish infratuzilmasini rivojlantirish chora-tadbirlari to‘g‘risida”gi PQ-454-son qarori asosida tumanning “Pachkamar” mahallasi, Qirpachkamar qishlog‘ida umumiy qiymati 1,68 mlrd so‘m bo‘lgan, 50 qatnovli “Pachkamar oilaviy shifokorlik punkti” yangidan qurib foydalanishga topshirildi.
Ochilish marosimida G‘uzor tumani hokimi Bekzod Suyunov, keksalar, tibbiyot sohasi vakillari hamda keng jamoatchilik ishtirok etdi. Tadbirda so‘zga chiqqanlar ushbu inshoot aholining hayot sifatini yaxshilashda muhim ahamiyat kasb etishini ta’kidladilar.
Yangi tibbiyot muassasasida aholiga birlamchi tibbiy yordam ko‘rsatish uchun barcha shart-sharoitlar yaratilgan. Xususan, zamonaviy tibbiy uskuna va jihozlarga ega qabul va tekshiruv xonalari, ona va bolalar salomatligini muhofaza qilishga qaratilgan profilaktika xizmatlar, shifokor va hamshiralar uchun qulay ish joylari tashkil etilgan.
Tibbiyot punkti ishga tushishi natijasida Qirpachkamar qishlog‘i va unga yaqin hududlarda yashovchi minglab aholi uchun sifatli tibbiy xizmatlar yaqin joyning o‘zida taqdim etiladi.