G‘uzorda yangi madaniyat markazi foydalanishga topshirildi
2025-08-31 14:10:00 / Yangiliklar
Mamlakatimiz mustaqilligining 34 yilligi munosabati bilan G‘uzor tumani "Guliston" mahallasida zamonaviy ko‘rinishga ega yangi Madaniyat markazi foydalanishga topshirildi.
Umumiy qiymati 1,2 milliard so‘m mablag‘ evaziga rekonstruksiya qilingan ushbu maskan qisqa muddat ichida butunlay yangidan barpo etilib, aholiga madaniy-ma’rifiy xizmat ko‘rsatish imkoniyatlari yanada kengaydi.
Markazda keng va qulay majlislar zali, turli to‘garaklar faoliyatini yo‘lga qo‘yish uchun alohida xonalar, kutubxona, kompyuter xonalari hamda yoshlar ijodiyoti uchun zarur sharoitlar yaratildi. Shuningdek, aholining bo‘sh vaqtini mazmunli o‘tkazishi, bolalar va yoshlarning iqtidorini yuzaga chiqarish uchun zarur infratuzilma ham tashkil etilgan.
Tantanali ochilish marosimida tuman hokimi Bekzod Suyunov, soha vakillari, nuroniylar va keng jamoatchilik ishtirok etdi.
Tadbir davomida nutq so‘zlaganlar mazkur maskanning foydalanishga topshirilishi nafaqat Guliston mahallasi, balki butun tuman aholisi uchun katta quvonch bo‘lishini, bu kabi inshootlar yurtimizda madaniyat va san’at rivojiga xizmat qilishini alohida ta’kidlashdi.
Ayniqsa, tumanimizning olis hududlarida shunday zamonaviy madaniyat markazlarining barpo etilishi Prezidentimiz rahnamoligida amalga oshirilayotgan islohotlarning amaliy samarasidir.