Guliston tumanida "Mahallada obodlik va mehr-saxovat oyligi" doirasida amalga oshirilayotgan ishlar yuzasidan kamchiliklar tanqidiy muhokama qilindi
2026-07-27 16:15:00 / Yangiliklar
Guliston tumanida mamlakatimiz Mustaqilligining 35 yilligini munosib kutib olish maqsadida e'lon qilingan "Mahallalarda obodlik va mehr-saxovat oyligi" doirasida bunyodkorlik, obodonlashtirish va sanitariya-tozalik ishlari izchil davom etmoqda.
Bugun erta tongdan "Ahmad Yassaviy" va "Ahillik" mahallalari aholisi, mahalla faollari hamda nuroniylari hamjihatlikda hashar uyushtirib, hududlarni obodonlashtirish, ariq-zovurlarni tozalash, ko'cha chetlarini tartibga keltirish va sanitariya ishlari bilan shug'ullandilar.
Shu bilan birga, o'rganishlar davomida ayrim ko'chalarda obodonlashtirish ishlari talab darajasida emasligi aniqlandi. Xususan, ba'zi xonadonlarning tashqi devorlari oqlanmagan, hovli va tomorqalarda begona o'tlar o'sib ketgan, ayrim qarovsiz xonadonlar esa uzoq vaqtdan buyon e'tiborsiz qolib, ko'chalarning umumiy qiyofasiga salbiy ta'sir ko'rsatmoqda.
"Ahillik" va "Ahmad Yassaviy" mahallalaridagi o'rganishlar davomida tuman hokimi Olimjon Jo'rayev mavjud kamchiliklarni keskin tanqid qildi. Tuman rahbari faqat ko'chalarni suv sepib supurish bilan obodonlashtirish oyligining maqsadiga erishib bo'lmasligini ta'kidlab, mahalla yettiligi faoliyatiga tanqidiy baho berdi hamda mas'ullarga so'nggi ogohlantirishlarni bildirdi.
Mutasaddilarga xonadon egalarini ogohlantirish, qarovsiz hududlarni tartibga keltirish, tomorqalarga ishlov berish, tashqi devorlarni oqlash va obodonlashtirish ishlarini jadallashtirish yuzasidan aniq topshiriqlar berildi.
Mas'ullarga bir hafta muddat ichida aniqlangan kamchiliklarni to'liq bartaraf etish, ko'chalardagi devorlarni oqlash, begona o'tlarni tozalash hamda mahallalarning sanitariya va obodonlashtirish holatini belgilangan talablar darajasiga keltirish vazifasi yuklatildi.