Sirdaryo viloyati Guliston tumani hokimligi

Guliston tumani Iste'molchilar huquqini himoya qilish jamiyati tomonidan ommaviy axborot vositalari vakillari ishtirokida “Ish o‘rinlari va daromad: aholi farovonligi uchun nimalar qilindi?” hamda “Budjet va mablag‘lar: ajratilgan pul qayerga va qanday sarflandi?” mavzulariga bag‘ishlangan matbuot anjumani tashkil etildi.
 

Matbuot anjumanida jamiyat tomonidan joriy yil davomida iste'molchilarning qonuniy huquq va manfaatlarini himoya qilish, murojaatlarni o‘z vaqtida ko‘rib chiqish, aholining huquqiy savodxonligini oshirish hamda tadbirkorlik subyektlari bilan hamkorlikni mustahkamlash borasida amalga oshirilgan ishlar yuzasidan batafsil ma'lumot berildi.

Anjumanda ta'kidlanganidek, fuqarolardan kelib tushayotgan murojaatlar belgilangan tartibda o‘rganilib, ularning qonuniy manfaatlarini tiklash, yuzaga kelayotgan nizolarni sudgacha hal etish hamda iste'molchilar huquqlarining buzilishiga yo‘l qo‘ymaslik bo‘yicha amaliy choralar ko‘rilmoqda. Shu bilan birga, aholining iste'molchilik madaniyatini yuksaltirish maqsadida targ‘ibot va tushuntirish ishlari muntazam tashkil etilayotgani qayd etildi.

Shuningdek, matbuot anjumanida budjet mablag‘laridan maqsadli va samarali foydalanish, ajratilgan mablag‘larning asosiy yo‘nalishlari hamda ularning sarflanishi yuzasidan ochiqlik va shaffoflik tamoyillari asosida ma'lumotlar taqdim etildi. Budjet mablag‘larining amaldagi qonunchilik talablari asosida sarflanishi ustidan doimiy nazorat o‘rnatilgani alohida ta'kidlandi.

Tadbir yakunida OAV vakillarini qiziqtirgan savollarga batafsil javoblar berildi hamda kelgusida iste'molchilar huquqlarini ishonchli himoya qilish, aholiga ko‘rsatilayotgan xizmatlar sifatini yanada yaxshilash va jamoatchilik bilan ochiq muloqotni kuchaytirish bo‘yicha ustuvor vazifalar belgilab olindi.