Guliston tumanida katta loyiha, minglab ish o‘rinlari va yangi imkoniyatlar yaratiladi
2026-01-09 18:20:00 / Yangiliklar
Bugun Guliston tumaniga Xitoy Xalq Respublikasining Shandon provinsiyasidan kelgan bir guruh tadbirkorlar tashrif buyurdi. Mehmonlar tuman hokimining o‘rinbosari Odiljon Jumabekov hamrohligida kutib olinib, hududda amalga oshirilishi rejalashtirilayotgan istiqbolli loyihalar uchun ajratilgan maydonlar bilan yaqindan tanishtirildi.
Ikki tomonlama manfaatli uchrashuvlar davomida investorlar “Tajribakor” mahallasida joylashgan 68 gektar yer maydonida tashkil etilgan maxsus sanoat zonasida yirik investitsiya loyihasini amalga oshirish bo‘yicha muzokaralar olib bordi. Xususan, qiymati 200 million AQSH dollarini tashkil etuvchi ushbu loyiha doirasida sovutish va isitish uskunalari, turli santexnik vositalar hamda xalq xo‘jaligida keng qo‘llaniladigan mahsulotlar ishlab chiqarish rejalashtirilmoqda. Natijada 3 mingta yangi ish o‘rni yaratilishi ko‘zda tutilgan.
Qayd etilishicha, ishlab chiqariladigan mahsulotlar asosan eksportga yo‘naltiriladi. Shu bilan birga, xomashyoning katta qismi mahalliy bozorga chiqarilib, hudud aholisi bandligini ta’minlashga xizmat qiladi. Uchrashuv yakunida investorlar mazkur loyihani joriy yilning birinchi choragi yakuniga qadar ishga tushirish niyatida ekanliklarini bildirishdi.