Guliston tumani “Sohilobod” mahallasida ishlab chiqilgan master-rejaga muvofiq tashkil etilayotgan yirik loyiha yuzasidan Malayziyaning nufuzli tadbirkorlari va keng jamoatchilik vakillari ishtirokida taqdimot o'tkazildi
2025-11-19 16:30:00 / Yangiliklar
O‘zbekiston Respublikasi Prezidentining 2025-yil 6-martdagi PQ-93-sonli qarori doirasida Sirdaryo daryosi bo‘yidagi hududlarni kompleks rivojlantirishga oid chora-tadbirlar belgilandi va ushbu yo‘nalish Guliston hamda Sirdaryo tumanlarida ulkan turizm loyihasini yo‘lga qo‘yishga xizmat qilmoqda.
Qarorning 13-ilovasi va 18.2-bandida daryo bo‘yidagi maqbul hududlarda ekoparklar, piknik zonalari, chodirli va o‘tovli lagerlar, baliq ovlash maskanlari, qayiq va suv sayohatlari, shuningdek baliq mahsulotlari va mahalliy taomlarni sotish uchun infratuzilma yaratish bo‘yicha master-rejalar ishlab chiqish topshirig‘i berilgan. Ushbu vazifa mintaqada barqaror, ekologik toza va jozibador dam olish hududlarini yaratish bo‘yicha aniq amaliy yo‘l xaritasi hisoblanadi.
Loyihaning amaliy bosqichi esa xususiy hamkorlik asosida Malayziyaning tajribali "APUDG SDN BHD" kompaniyasi ishtirokida boshlandi. Ularning zamonaviy urbanistik yondashuvlari, ekologik jihatdan ongli joylashtirish va joysozlik tajribasi loyiha uchun muhim boylik bo‘ladi.
Guliston tumani hokimligi bilan hamkorlikda o‘tkazilgan taqdimotlarda Malayziyalik mutaxassislar loyiha konsepsiyasi, infratuzilma chizmalarini, dam olish va turizm xizmatlari komplekslarini joriy etish bosqichlarini batafsil tushuntirishdi. Mahalliy tadbirkorlar va jamoatchilik bilan olib borilayotgan muzokaralar natijasida loyiha hududning an’anaviy hayot tarzi va tabiiy muhitini saqlagan holda yangi ish o‘rinlari va xizmat ko‘rsatish sohalarini yaratishga yo‘naltiriladi bu esa ijtimoiy-iqtisodiy barqarorlikka hissa qo‘shadi.