Tоshkеnt vilоyati Favqulodda vaziyatlar bosh boshqarmasi

Toshkent viloyati Favqulodda vaziyatlar bosh boshqarmasi O‘zbekiston Respublikasi Favqulodda vaziyatlar vazirligi tizimidagi hududiy davlat boshqaruvi organi hisoblanadi. Bosh boshqarma viloyat hududida favqulodda vaziyatlarning oldini olish, aholi va hududlarni muhofaza qilish, yong‘in xavfsizligini ta’minlash, shuningdek qutqaruv hamda avariya-tiklash ishlarini tashkil etish vazifalarini amalga oshiradi.

    O‘zbekiston Respublikasi Favqulodda vaziyatlar vazirligi O‘zbekiston Respublikasi Prezidentining 1996-yil 4-martdagi PF–1378-sonli Farmoni asosida tashkil etilgan. Mazkur hujjat bilan favqulodda vaziyatlarning oldini olish, ularning oqibatlarini bartaraf etish hamda fuqaro muhofazasi sohasida yagona davlat tizimi shakllantirilgan. Shu asosda respublika bo‘ylab hududiy boshqarmalar, jumladan Toshkent viloyati Favqulodda vaziyatlar boshqarmasi ham faoliyat yurita boshlagan.

    Tizimni yanada takomillashtirish maqsadida O‘zbekiston Respublikasi Prezidentining 2019-yil 10-apreldagi PF–5706-sonli Farmoniga muvofiq, Ichki ishlar vazirligi tizimidagi Yong‘in xavfsizligi bosh boshqarmasi hamda uning hududiy tuzilmalari Favqulodda vaziyatlar vazirligi tizimiga o‘tkazildi. Mazkur islohot natijasida yong‘in xavfsizligi va qutqaruv xizmatlari yagona boshqaruv tizimi asosida birlashtirildi.

    2025-yilda sohaga oid muhim islohotlar davom ettirilib, O‘zbekiston Respublikasi Prezidentining 2025-yil 20-oktyabrdagi PF–185-sonli Farmoni hamda PQ–310 va PQ–311-sonli qarorlari asosida favqulodda vaziyatlardan muhofaza qilish tizimi yangi bosqichga olib chiqildi.

Ushbu hujjatlarga muvofiq:

• favqulodda vaziyatlarning barvaqt oldini olish tizimi tubdan takomillashtirildi;
• mahalla va xonadon darajasida profilaktika mexanizmlari joriy etildi;
• yong‘in va texnogen xavflarni boshqarishning zamonaviy tizimi yo‘lga qo‘yildi;
• sun’iy intellekt, raqamli texnologiyalar va monitoring tizimlari keng joriy etildi;
• favqulodda vaziyatlar organlari faoliyatini raqamlashtirish va modernizatsiya qilish choralari belgilandi;
• aholini tezkor ogohlantirish hamda axborot bilan ta’minlash tizimi kuchaytirildi.

Boshqarmaning asosiy vazifalari

• favqulodda vaziyatlarning oldini olish;
• yong‘in xavfsizligini ta’minlash;
• qutqaruv va avariya-tiklash ishlarini tashkil etish;
• tabiiy hamda texnogen ofatlar oqibatlarini bartaraf etish;
• aholini favqulodda vaziyatlarda to‘g‘ri harakat qilishga o‘rgatish;
• profilaktik va targ‘ibot tadbirlarini o‘tkazish;
• maxsus-taktik o‘quv mashqlarini tashkil etish.

Asosiy funksiyalari

• favqulodda vaziyatlar xavfini monitoring qilish va tahlil etish;
• yong‘in nazorati hamda profilaktikasini amalga oshirish;
• hududiy qutqaruv xizmatlari faoliyatini muvofiqlashtirish;
• favqulodda vaziyatlarda tezkor boshqaruvni tashkil etish;
• aholini ogohlantirish va axborot bilan ta’minlash;
• tegishli tashkilotlar bilan hamkorlikda xavfsizlik choralarini amalga oshirish.

Bugungi kunda Toshkent viloyati Favqulodda vaziyatlar bosh boshqarmasi tomonidan viloyatda aholi xavfsizligini ta’minlash, favqulodda vaziyatlarning oldini olish, yong‘in-qutqaruv xizmatlari samaradorligini oshirish hamda zamonaviy texnologiyalarni joriy etish borasida keng ko‘lamli ishlar olib borilmoqda.