Tоshkеnt vilоyati Favqulodda vaziyatlar bosh boshqarmasi

Toshkent viloyati Favqulodda vaziyatlar bosh boshqarmasi Chirchiq shahar Favqulodda vaziyatlar bo‘limi tomonidan yozgi ta’til mavsumida bolalarning xavfsizligini ta’minlash maqsadida Chirchiq shahridagi umumiy o‘rta ta’lim maktablari huzurida tashkil etilgan sog‘lomlashtirish oromgohlarida profilaktik va targ‘ibot tadbirlari tashkil etildi.

Tadbirlar davomida oromgohlarda dam olayotgan bolalarga favqulodda vaziyatlarning oldini olish, yong‘in xavfsizligi qoidalariga rioya etish, suv havzalarida xavfsiz harakatlanish hamda turli xavfli holatlarda to‘g‘ri harakat qilish bo‘yicha tushuntirishlar berildi. Shuningdek, mutaxassislar tomonidan bolalarning yoshiga mos ravishda amaliy va interaktiv mashg‘ulotlar o‘tkazilib, favqulodda vaziyatlar yuzaga kelganda harakatlanish tartibi ko‘rgazmali tarzda namoyish etildi.

Mashg‘ulotlar jarayonida ishtirokchilar Favqulodda vaziyatlar vazirligi tizimida foydalaniladigan maxsus yong‘in-qutqaruv texnikalari, asbob-uskunalar hamda himoya vositalari bilan yaqindan tanishtirildi. Mutaxassislar tomonidan texnikalarning vazifalari va ulardan foydalanish tartibi haqida batafsil ma’lumotlar berildi.

Mazkur tadbirlar bolalarda xavfsizlik madaniyatini shakllantirish, favqulodda vaziyatlarda to‘g‘ri qaror qabul qilish ko‘nikmalarini rivojlantirish hamda ularning bo‘sh vaqtini mazmunli tashkil etishga xizmat qilmoqda. Shu bilan birga, yosh avlodning qutqaruvchilar kasbiga bo‘lgan qiziqishini oshirish va hayot faoliyati xavfsizligi bo‘yicha bilimlarini mustahkamlashga qaratilgan.