Forish tumani IIB boshlig‘i Naimov Begzod Akramovichning tuman aholisiga murojaati
2026-06-20 10:00:00 / Yangiliklar
Hurmatli Forish tumani aholisi!
Bugungi kunda giyohvandlik jamiyatimiz oldida turgan eng jiddiy tahdidlardan biri sanaladi. Bu illat insonning nafaqat salomatligiga, balki uning orzu-intilishlari, oilaviy baxti, jamiyatdagi mavqei va kelajagiga ham katta zarar yetkazadi. Ayniqsa, yoshlar o‘rtasida giyohvand moddalar tarqalishining oldini olish barchamizning ustuvor vazifamiz bo‘lib qolmoqda.
Ko‘pincha oddiy qiziqish yoki atrofdagilarning ta’siri ostida qabul qilingan bir dona giyohvand modda ham insonni og‘ir qaramlik girdobiga tortib ketishi mumkin. Buning oqibatida yoshlar ta’limdan, mehnatdan va jamiyat hayotidagi faol ishtirokdan uzoqlashadi. Giyohvandlik insonning tafakkurini susaytiradi, sog‘lig‘iga jiddiy putur yetkazadi hamda uni turli huquqbuzarlik va jinoyatlarga yetaklashi mumkin.
Eng ayanchlisi shundaki, bu illat yoshlarning ulkan orzulari va yorqin istiqbolini barbod etadi. Ota-onaning ishonchi, ustozlarning sa’y-harakati va yillar davomida erishilgan muvaffaqiyatlar birgina noto‘g‘ri qadam sabab yo‘qqa chiqishi mumkin.
Shuni alohida ta’kidlash joizki, giyohvand moddalarni saqlash, iste’mol qilish, olib yurish yoki tarqatish amaldagi qonunchilikka ko‘ra qat’iyan taqiqlangan. Bunday qilmishlar uchun ma’muriy hamda jinoiy javobgarlik belgilangan bo‘lib, qonunni buzgan har bir shaxs qonun oldida javob beradi. Birgina xato qaror insonni nafaqat sog‘ligidan, balki ozodligidan ham mahrum etishi mumkin.
Aziz yurtdoshlar!
Sizlar yurtimizning ertangi kuni, oilalaringizning tayanchi va jamiyatimizning eng katta boyligisiz. Hayotingizni giyohvandlik kabi halokatli illat xavfi ostiga qo‘ymang. Sog‘lom turmush tarziga amal qiling, sport bilan shug‘ullaning, bilim oling va ezgu maqsadlar sari intiling. Hayot – inson uchun eng bebaho ne’mat. Uni asrash va qadrlash har birimizning burchimizdir.
Giyohvandlikka qat’iy “Yo‘q!” deng! O‘z kelajagingizni bugundan himoya qiling!
Forish tumani IIB boshlig‘i podpokovnik Naimov Begzod Akramovich