O'zbekiston Respublikasi Vazirlar Mahkamasi huzuridagi Energiya samaradorligi milliy agentligi

Energiya samaradorligi milliy agentligi tomonidan qayta tiklanuvchi energiya manbalari qurilmalarini — quyosh panellari, geliokollektorlar va issiqlik nasoslarini sotish va oʻrnatish boʻyicha Energiya samaradorligini oshirish raqamli platformasida savdolarni oʻtkazish, shartnoma tuzish, yetkazib berish va oʻrnatish tartibi belgilandi.

Tartibga koʻra, yetkazib beruvchilar tomonidan Platformaga joylashtirilgan mahsulot takliflari ommaviy oferta hisoblanadi. Taklifda mahsulot nomi, markasi, soni, ishlab chiqaruvchisi, texnik xususiyatlari, quvvati, narxi, ishlab chiqarilgan yil, yaroqlilik va kafolat muddati, yetkazib berish hududi va fotosurati koʻrsatiladi.

Yetkazib beruvchining ofertasi 15 ish kuni amal qiladi va ushbu muddat tugagach, yana 15 ish kuniga faollashtirish mumkin. Savdolarda mahsulot narxi soʻrovi orqali raqobatli takliflar taqqoslanadi va talabgor tomonidan eng maqbul narxli taklif tanlanadi.

Platformada bitim summasidan 0,15 foiz (biroq BHMning 2 baravaridan ortiq boʻlmagan) miqdorda yetkazib beruvchidan komissiya undiriladi.

Ushbu tartibning joriy etilishi qayta tiklanuvchi energiya manbalari qurilmalarini sotish va oʻrnatish jarayonlarini shaffof, ochiq va raqobatli asosda amalga oshirilishini taʼminlaydi.