Aholi uy-joylarida energiya samaradorligini oshirishga qaratilgan yangi qaror qabul qilindi
2025-10-29 10:10:00 / Yangiliklar
Oʻzbekiston Respublikasi Vazirlar Mahkamasining “Energiya servis xizmatlari bozorini shakllantirish hamda aholi uy-joylarining energiya samaradorligi oshirilishini ragʻbatlantirish chora-tadbirlari toʻgʻrisida”gi 673-sonli qarori qabul qilindi.
Qarorga muvofiq, davlat xizmatlarini raqamlashtirish va aholiga qulayliklar yaratish maqsadida 2025-yil noyabr oyidan boshlab Energiya samaradorligi milliy agentligi tomonidan Energiya samaradorligini oshirish raqamli platformasi orqali subsidiya ajratish mexanizmlari belgilab berildi.
Endilikda aholi energiya samarador texnologiyalar va qayta tiklanuvchi energiya manbalari qurilmalarini xarid qilishda subsidiyalardan foydalanishi mumkin boʻladi.
Jumladan:
“Yashil taʼmir” va “yashil” isteʼmol kreditlari boʻyicha foiz stavkasining 19 foizdan oshgan qismi (biroq 4 foizdan koʻp boʻlmagan miqdorda) Energiya samaradorligini ragʻbatlantirish va qoʻllab-quvvatlash jamgʻarmasi mablagʻlari hisobidan qoplab beriladi:
- uy-joylarni energiya auditidan oʻtkazish xarajatlarining 100 foizi;
- quyosh panellari, geliokollektorlar, maishiy isitish qozonlari va boshqa energiya tejovchi qurilmalar uchun xarajatlarning 20 foizi;
- issiqlik nasoslarini xarid qilish va oʻrnatish xarajatlarining 40 foizi (bazaviy hisoblash miqdorining 50 baravarigacha) subsidiya sifatida toʻlab beriladi.
Shuningdek, tijorat banklari orqali toʻqimachilik sanoati korxonalariga quyosh panellarini xarid qilish va oʻrnatish uchun ajratiladigan kreditlar boʻyicha foiz toʻlovlarining 10 foiz bandigacha Energiya samaradorligi millliy agentligi tomonidan kompensatsiya ajratiladi.
Ushbu qaror mamlakatda energiya samarador turmush tarzini shakllantirish, zamonaviy texnologiyalarni joriy etish hamda aholi uy-joylarida energiya tejamkorlikni oshirishga xizmat qiladi.