“Korrupsiya – jamiyat tanasidagi saraton”: tizim xodimlari uchun o‘quv-seminar o‘tkazildi
2025-10-20 14:05:00 / Yangiliklar
O‘zbekiston Respublikasida korrupsiyaga qarshi kurashish borasida izchil va tizimli chora-tadbirlar amalga oshirilmoqda. Shu maqsadda Energiya samaradorligi milliy agentligida “Korrupsiya – jamiyat tanasidagi saraton” mavzusida yig‘ilish o‘tkazildi. Unda tizimdagi barcha xodimlar ishtirok etdi.
Tadbirda korrupsiya islohotlar yo‘lidagi eng katta to‘siq ekani, uni bartaraf etish esa har bir xodimning fuqarolik burchi va vijdon ishi ekani ta’kidlandi. O‘zbekiston Respublikasi Prezidenti Shavkat Mirziyoyev ta’kidlaganlaridek, “jamiyat korrupsiyani tanadagi saraton sifatida qabul qilishi, har bir fuqaro esa “halollik vaksinasi” bilan emlanishi” zarur.
Yig‘ilishda korrupsiyaga qarshi kurashish borasida qabul qilingan muhim hujjatlar, jumladan, “Manfaatlar to‘qnashuvi to‘g‘risida”gi Qonun va “Davlat xaridlari to‘g‘risida”gi Qonunning ahamiyati yoritib o‘tildi.
Agentlikda korrupsiyaning oldini olish, halollik muhitini shakllantirish maqsadida Komplayens nazorati va ichki audit bo‘yicha bo‘limi faoliyati yo‘lga qo‘yilgan. Shu asosda 13 ta ichki normativ-huquqiy hujjat ishlab chiqilgan.
Tadbir yakunida korrupsiyaga qarshi kurashish tizimdagi har bir xodimdan halollik, ochiqlik va mas’uliyat talab etilishi, ushbu tamoyillarga qat’iy amal qilish davlat xizmatining nufuzini oshirishda muhim omil ekani qayd etildi.