Maktab va shifoxonalarning energiya samaradorligini oshirish boʻyicha qoʻshma bayonnoma imzolandi
2025-09-18 09:05:00 / Yangiliklar
Namangan shahrida 17-sentyabr kuni “Kambagʻallikdan farovonlik sari” III xalqaro forumida 200 ga yaqin xalqaro ekspertlar ishtirok etmoqda. Tadbir doirasidagi sessiyalarda kambagʻallikni qisqartirishda bozor talablari, islom moliyasining imkoniyatlari, biznes inklyuzivligi, inson kapitaliga sarmoya mavzularida innovatsion yondashuvlar muhokama qilinmoqda.
Forum doirasida Yaponiya xalqaro hamkorlik agentligi, Oʻzbekiston Respublikasi Iqtisodiyot va moliya vazirligi, Investitsiyalar, sanoat va savdo vazirligi hamda Energiya samaradorligi milliy agentligi oʻrtasida Oʻzbekiston maktablari va shifoxonalarining energiya samaradorligini oshirish loyihasi yuzasidan hamkorlik Bayonnomasi imzolandi.
Memorandumda koʻzda tutilgan maqsadlarga erishish yoʻlida maktab va shifoxonalarning real holatini tahlil qilish, issiqlik va elektr energiyasi yoʻqotish manbalarini aniqlash, energiya tejovchi texnologiyalarni joriy etish, quyosh panellari va qayta tiklanuvchi energiya manbalarini tatbiq etish ishlari uchun mablagʻlar jalb qilish koʻzda tutilgan.
Mazkur tashabbus orqali mamlakatimizdagi maktablar va shifoxonalarda energiya samaradorligi oshirilib, zamonaviy energiya tejovchi texnologiyalar joriy etiladi.