O'zbekiston Respublikasi Vazirlar Mahkamasi huzuridagi Energiya samaradorligi milliy agentligi

Energiya samaradorligi milliy agentligi (ESMA) va Osiyo infratuzilma investitsiyalari banki (OIIB) oʻrtasida ishchi uchrashuv boʻlib oʻtdi.

Uchrashuvda energiya samaradorligini oshirish va barqaror rivojlanish yoʻnalishida zamonaviy moliyaviy mexanizmlarni joriy etish, shuningdek, qoʻshma tashabbuslarni amalga oshirish imkoniyatlari muhokama qilindi.

Agentlik tomonidan jamoat binolarini modernizatsiya qilish, energiya servis xizmatlari bozorini (ESCO) shakllantirish hamda monitoring qilish tizimlarini takomillashtirish uchun raqamli instrumentlarni rivojlantirishga qaratilgan milliy tashabbuslar taqdim etildi.

Oʻz navbatida, OIIB vakillari “yashil” infratuzilmani rivojlantirish va barqaror shahar rivojlanishini qoʻllab-quvvatlash bankning ustuvor yoʻnalishlaridan ekanini taʼkidlab, ESMA bilan hamkorlikda grant va kredit loyihalarini amalga oshirishga tayyorligini bildirdi.

Uchrashuv yakunida tomonlar qoʻshma loyihalar takliflarini ishlab chiqish, hamkorlikni yanada kengaytirish va amaliy natijalarga erishish yuzasidan kelishib oldilar.

Maʼlumot uchun:

Osiyo infratuzilma investitsiyalari banki (OIIB) — koʻp tomonlama rivojlanishga yo‘naltirilgan moliyaviy tuzilma boʻlib, uning asosiy faoliyati Osiyo va boshqa qit’alarda infratuzilmani barqaror rivojlantirishga asoslangan.