Zarafshonda energiya samarador texnologiyalarni joriy etish boʻyicha tushuntirish ishlari olib borildi
2026-03-26 17:25:00 / Yangiliklar
Navoiy viloyatining Zarafshon shahrida Energiya samaradorligi milliy agentligi tomonidan energiya samaradorligini oshirish va energiya resurslaridan oqilona foydalanishga bagʻishlangan seminarlar tashkil etildi.
Tadbirlar davomida ishtirokchilarga energiya samarador texnologiyalarni joriy etish, binolarda energiya sarfini kamaytirish usullari hamda energiya auditining ahamiyati haqida maʼlumotlar berildi. Shuningdek, energiya isteʼmolini tahlil qilish orqali xarajatlarni qisqartirish imkoniyatlari keng tushuntirildi.
Seminarlarda Oʻzbekiston Respublikasi Vazirlar Mahkamasining “Energiya servis xizmatlari bozorini shakllantirish hamda aholi uy-joylarining energiya samaradorligi oshirilishini ragʻbatlantirish chora-tadbirlari toʻgʻrisida”gi 673-sonli qarori mazmun-mohiyati yuzasidan tushuntirishlar berildi. Unga koʻra, aholi va tadbirkorlik subyektlari uchun bir qator imtiyoz va subsidiyalar joriy etilgani taʼkidlandi. Jumladan, uy-joylarda energiya auditini oʻtkazish xarajatlarini qoplash, quyosh panellari va geliokollektorlar, issiqlik nasoslarini xarid qilish va oʻrnatish uchun ajratiladigan subsidiyalar, shuningdek, “yashil” kreditlar boʻyicha qoʻllab-quvvatlash mexanizmlari mavjudligi qayd etildi.
Bundan tashqari, Energiya samaradorligini oshirish raqamli platformasi orqali subsidiyalarga onlayn ariza topshirish hamda energiya samarador qurilmalarni xarid qilish va oʻrnatish mexanizmi ochiq va shaffofligi haqida ham maʼlumot berildi.
Taʼkidlash kerakki, bunday seminarlar aholi va tadbirkorlar oʻrtasida energiya resurslaridan oqilona foydalanish va isrofdan tiyilishga asoslangan turmush tarzi va feʼl-atvorni shakllantirishga xizmat qiladi.