O'zbekiston Respublikasi Vazirlar Mahkamasi huzuridagi Energiya samaradorligi milliy agentligi

Vazirlar Mahkamasi huzuridagi Energiya samaradorligi milliy agentligi hamda Xalqaro moliya korporatsiyasi (IFC) o‘rtasida hamkorlik bitimini imzolash marosimi bo‘lib o‘tdi.

Mazkur hamkorlik O‘zbekistonda energiya tejamkor va ekologik barqaror qurilish amaliyotlarini rivojlantirishga qaratilgan bo‘lib, uning doirasida Agentlik va IFC hamkorligida “Yashil binolar” loyihasini amalga oshirish rejalashtirilmoqda. Loyiha doirasida “yashil” binolarni qurish va modernizatsiya qilishni qo‘llab-quvvatlashga qaratilgan moliyaviy hamda nomoliyaviy rag‘batlantirish paketini ishlab chiqish va joriy etish ko‘zda tutilgan.

Hamkorlik bitimi O‘zbekistonda “yashil” qurilish amaliyotlarini jadal joriy etish uchun keng qamrovli rag‘batlantirish choralari majmuasini ishlab chiqish va amalga oshirishni nazarda tutadi. Ushbu jarayonda vazirliklar va davlat idoralari o‘rtasida tarmoqlararo hamkorlikni yo‘lga qo‘yish, jumladan, tarif islohotlari, imtiyozli kredit mexanizmlari hamda boshqa qo‘llab-quvvatlovchi instrumentlarni ishlab chiqish muhim ahamiyat kasb etadi.

Hamkorlik doirasida “yashil” binolar uchun rag‘batlantirish choralarini ishlab chiqish va amalga oshirish maqsadida idoralararo ishchi guruh tashkil etilishi belgilandi. Ushbu ishchi guruh tarkibiga Markaziy bank, Iqtisodiyot va moliya vazirligi, Qurilish va uy-joy kommunal xo‘jaligi sohasidagi vakolatli tashkilotlar, “O‘zstandart” agentligi, Suv xo‘jaligi vazirligi hamda boshqa manfaatdor idoralar jalb etiladi.

Hamkorlikning yana bir yo‘nalishi “yashil” binolar uchun normativ huquqiy asoslarni ishlab chiqish va joriy etishni qamrab oladi. Xususan, “yashil” binolarni sertifikatlash tizimini joriy etish, rag‘batlantirish mexanizmlari, tartib-taomillar va institutsional tuzilmalarni shakllantirish rejalashtirilgan.

Shuningdek, “Yashil mahallalar” konsepsiyasini ishlab chiqish hamda ushbu konsepsiyani tasdiqlash bo‘yicha Vazirlar Mahkamasi qarorini qabul qilish jarayonida IFC tomonidan konsalting xizmatlari ko‘rsatiladi. Ushbu konsepsiya aholi yashash muhitining energiya samaradorligini oshirish, resurslardan oqilona foydalanish va ekologik barqarorlikni ta’minlashga xizmat qiladi.

Uchrashuv yakunida tomonlar o‘zaro hamkorlikni mustahkamlashga kelishib olib, Energiya samaradorligi milliy agentligi va IFC o‘rtasida tegishli shartnoma imzolandi. Mazkur hamkorlik mamlakatda “yashil” iqtisodiyot tamoyillarini joriy etish, energiya iste’moli samaradorligini oshirish hamda xalqaro ilg‘or tajribalarni amaliyotga tatbiq etishda muhim qadam bo‘lib xizmat qiladi.