O'zbekiston Respublikasi Vazirlar Mahkamasi huzuridagi Energiya samaradorligi milliy agentligi

Oʻzbekiston Respublikasi Prezidentining 2025-yil 27-dekabrdagi qarori bilan 2026-2028 yillarda mamlakatning ijtimoiy va ishlab chiqarish infratuzilmasini rivojlantirishga qaratilgan yangi Dastur tasdiqlandi. Ushbu qaror “Oʻzbekiston — 2030” strategiyasida belgilangan vazifalarni amalga oshirishni jadallashtirish, atrof-muhitni asrash, iqlim oʻzgarishi oqibatlarini yumshatish hamda “yashil” iqtisodiyot tamoyillarini hududlarda keng joriy etishga qaratilgani bilan ahamiyatlidir.

Qarorga muvofiq, Dasturning asosiy ustuvor yoʻnalishlaridan biri sifatida qurilish obyektlarini loyihalashda “yashil” texnologiyalarni keng qoʻllash, energiya samaradorligi standartlariga toʻliq rioya etish hamda qayta tiklanuvchi energiya manbalaridan samarali foydalanish belgilab qoʻyildi.

Shuningdek, qarorda issiqlik taʼminoti obyektlarining energiya samaradorligini oshirish maqsadida zamonaviy energiya tejamkor uskunalar oʻrnatish ishlariga 70 milliard soʻm mablagʻ yoʻnaltirilishi nazarda tutilgan. Mazkur chora-tadbirlar aholi va ijtimoiy soha obyektlarini barqaror hamda sifatli issiqlik bilan taʼminlash, shu orqali energiya sarfini kamaytirish imkonini beradi.

Qarorga koʻra, Dastur doirasida yangidan boshlanadigan obyektlarni loyihalashtirish jarayonida qurilishning atrof-muhitga taʼsirini kamaytirish, zamonaviy energiya tejovchi texnologiyalar va qayta tiklanuvchi energiya manbalari qurilmalarini joriy etish, ekologik toza hamda energiya samaradorligi yuqori boʻlgan qurilish materiallaridan foydalanish majburiy talab sifatida belgilandi. Ushbu talablar inobatga olinmagan loyihalarning loyiha-smeta hujjatlari ekspertizadan oʻtkazilishiga yoʻl qoʻyilmaydi.

Ushbu qaror ijrosi natijasida mamlakat hududlarida, ayniqsa mahallalarda zamonaviy, energiya samarador va ekologik barqaror infratuzilma shakllantirilishi, aholi hamda tadbirkorlik subyektlari uchun yanada qulay muhit yaratilishi kutilmoqda. Bu esa “yashil” iqtisodiyotga oʻtish jarayonlarini jadallashtirish va barqaror rivojlanish maqsadlariga erishishda muhim qadam hisoblanadi.