Toshkentda O‘zbekistonni ko‘kalamzorlashtirishning Bosh rejasi yakunlari sarhisob qilindi
2025-03-26 16:30:00 / Yangiliklar
Tadbir O‘zbekiston Ekologiya, atrof-muhitni muhofaza qilish va iqlim o‘zgarishi vazirligi tomonidan BMT Taraqqiyot dasturi, BMT Yevroosiyo iqtisodiy komissiyasi va Birlashgan Millatlar Tashkilotining Qochqinlar bo‘yicha Oliy komissari boshqarmasi hamkorligida tashkil etildi. Unda davlat organlari, xalqaro ekspertlar, BMT agentliklari, ilmiy jamoatchilik va xususiy sektor vakillari ishtirok etdi.
Seminar davomida “Yashil makon” milliy tashabbusini amalga oshirishning Bosh rejasi, jumladan, oʻrmonzorlarni barpo etish strategiyasi, koʻchatzorlarni rivojlantirish va moliyaviy modellar taqdim etildi. Mutaxassislar o‘rmonlarni barqaror o‘stirish va iqlimni moliyalashtirish bo‘yicha xalqaro tajriba, Surxondaryo viloyatida amalga oshirilgan tajriba loyihalarining muvaffaqiyati bilan o‘rtoqlashishdi. U yerda ko‘chatxonalarning tashkil etilishi nafaqat ko‘kalamzorlashtirish, balki mahalliy aholiga iqtisodiy imkoniyatlar ham olib kelgani ta'kidlandi.
"Yashil makon" umummilliy loyihasi doirasidagi bosh rejamiz xalqaro ekspertlar bilan birgalikda amalga oshirildi va ikki qismdan iborat. Seminarda bosh rejaning strategik maqsadlari va vazifalari ko‘rsatib o‘tildi. Shuningdek, xorijlik ekspertlarimiz tomonidan texnik qo‘llanmalar va uslublar ham taqdim etildi, — dedi Ekologiya vazirligi bo‘lim boshlig‘i O‘lmas Sobirov. — "Yashil makon" bosh rejasida aholi jon boshiga yashillik qoplamalarini 30 metr kvadratga yetkazish rejalashtirildi".
Ma’lumot uchun: o‘tgan yil davomida BMT hamkorlari, xalqaro va milliy ekspertlar hamda manfaatdor tomonlar ishtirokida keng qamrovli Bosh reja ishlab chiqildi. U maksimal ta'sir va barqaror rivojlanishga erishish uchun o'rmonchilik strategiyalarini, innovatsion moliyalashtirish mexanizmlarini va jamoatchilikni jalb qilish yondashuvlarini birlashtiradi.
"Hozirgi vaqtda Bosh reja loyihaning yakuniy natijasi sifatida qaralmoqda. Bundan tashqari, biz uning amalga oshirilishini monitoring qilish va "Yashil makon" tashabbusi samaradorligini oshirish uchun raqamli texnologiyalardan foydalanish imkoniyatlarini oʻrganmoqdamiz", — dedi BMT Taraqqiyot dasturining Oʻzbekistondagi doimiy vakili Akiko Fujii.
Seminar ochiq muloqot bilan yakunlanib, O‘zbekistonda o‘rmonzorlarni ko‘paytirishni kengaytirish bo‘yicha “Yo‘l xaritasi” ishlab chiqildi. Bu davlat, xususiy sektor va xalqaro tashkilotlar o‘rtasida hamkorlikni yo‘lga qo‘yish uchun qo‘shimcha imkoniyatlar yaratadi.