O‘zbekiston Respublikasi Ekologiya, atrof-muhitni muhofaza qilish va iqlim o‘zgarishi vazirligi

“Mamlakatda ekologik xavfsizlikni barqarorlashtirish tendensiyalari” (Ekomuvozanatni mustahkamlashga istiqbolli yondashuvlar) mavzusiga bag‘ishlangan konferensiyada 100 dan ortiq tashkilotlar va idoralar vakillari, oliy ta’lim muassasalari vakillari (onlayn va offlayn) ishtirok etdi.

Tadbirda nutq so’zlagan Ekologiya vaziri o‘rinbosari Jusipbek Kazbekov ekologik muammolarni tobora dolzarb tus olayotganini ta’kidladi.

“Bugungi kunda aholi soni va ehtiyojlari tobora ortib bormoqda. Shuningdek, turli sohalar, xususan,  iqtisodiyot, sanoat, ishlab chiqarish rivojlanmoqda. Bu esa o’z navbatida atrof-muhitga salbiy ta’sir ko’rsatib, turli ekologik muammolarga sabab bo’lmoqda. Mazkur muammolarni hal qilish uchun esa kuchlarni birlashtirish, birgalikda harakat qilish lozim”, — dedi J. Kazbekov.

Oliy Majlis Qonunchilik palatasi Ekologik harakati ijroiy qo’mitasi raisi Boriy Alixanov esa ekologik muammolarning ildizi uzoq yillarga borib taqalishini, bugungi kunga kelib esa ekologik xavfsizlikni ta’minlash har qachongidan ham dolzarb ekanligini qayd etdi.

“Transport vositalari, elektr stansiyalari, neft mahsulotlari, gaz, toshko’mir, yog’och, po’lat, alyuminiy va boshqa vosita hamda mahsulotlardan foydalanish soni ortib bormoqda. Xususan, qog’ozga talab oxirgi 60 yilda 5,7 baravar, neftdan foydalanish 7,5 baravar, toshko’mirdan foydalanish 4,2 baravarga ortdi. Shuningdek, bugungi kunda tabiiy boyliklarning 80 foizi aholi tomonidan iste’mol qilinadi. Shaharlar aholisi har hafta 1 mln nafarga ko’payadi. Bu esa ehtiyojlarning ortishiga olib keladi. Masalan, baliq ovlash so’nggi 50 yilda yiliga 18 mln tonnadan 115 mln tonnaga ortdi, baliq zaxiralarining 75 foizi qisqarib ketdi. Bu omillar ayni damda ekologik xavfsizlikka tahdid ortib borayotgani va kechiktirib bo’lmas chora-tadbirlarni talab qilishini ko’rsatadi”, – dedi B.Alixanov.

Konferensiyada tabiatni muhofaza qilish va tabiiy resurslardan oqilona foydalanish sohasidagi qonunchilik talablari buzilishining oldini olish, uni aniqlash va unga chek qo‘yish uchun ta’sirchan choralarni qo‘llashni yanada takomillashtirish kabi masalalar muhokama qilindi.

Shuningdek, ekologik xavfsizlikni mustahkamlash va ekologik vaziyatni yaxshilash bo‘yicha yetakchi xorijiy davlatlarning ilg‘or tajribalaridan kelib chiqib taklif va tavsiyalar ishlab chiqish, ekologik xavfsizlikni ta’minlash yuzasidan amaldagi normativ-huquqiy hujjatlarga o‘zgartirish va qo‘shimchalar kiritish maqsadida ilmiy asoslangan takliflarni tayyorlashga e’tibor qaratildi.