O‘zbekiston Respublikasi Ekologiya va iqlim o‘zgarishi milliy qo‘mitasi

Tadbirda Ekologiya, atrof-muhit va iqlim o‘zgarishi vazirligi, "Green University", Suvaysh kanali universiteti (Misr), Qirol Saud universiteti (Saudiya Arabistoni), Sharq bilan hamkorlikdagi amaliy tadqiqotlar markazi (CARPO) vakillari va boshqalar ishtirok etdi.

Uchrashuvdan ko‘zlangan maqsad Yaqin Sharq va Markaziy Osiyodagi shahar markazlarida uchrayotgan muayyan ekologik muammolarni o‘rganish va tajriba almashish hamda shahar sharoitida iqlim o‘zgarishlarini hal qilish bo‘yicha birgalikdagi imkoniyatlarni aniqlashdan iborat.

“Biz nafaqat Yaqin Sharq va Markaziy Osiyo, balki Yevropa va Markaziy Osiyo oʻrtasidagi bu birgalikdagi faoliyatga oʻz hissamizni qoʻshishimizdan xursandman”, — dedi Qirol Saud universitetining arxitektura va shaharsozlik bo‘yicha akademik va professional maslahatchisi Anna Laura Petruchchi.

Panel muhokamasi davomida ekspertlar barqaror shahar rivojlanishiga alohida e’tibor qaratgan holda atrof-muhit muammolari va iqlim o‘zgarishi bo‘yicha turli nuqtai nazarlarni ko‘rib chiqdilar. Barqaror rivojlanish amaliyotlari boʻyicha bilim almashish va turli hududlardagi ekspertlar va manfaatdor tomonlar oʻrtasidagi aloqalarni mustahkamlash iqlim oʻzgarishlarini bartaraf etish va shahar sharoitida hamda undan tashqarida barqaror rivojlanishni ragʻbatlantirish boʻyicha kelgusi hamkorlikni yanada mustahkamlashi taʼkidlandi.

“Bu yerda biz nafaqat iqtisodiyot, balki boshqa masalalar, jumladan, atrof-muhit masalalari bo‘yicha hamkorlikni ham muhokama qilamiz. O‘ylaymanki, biz ikkala mintaqa ham bu yo‘nalishda qanday ishlashi va hamkorlik qilishi mumkinligi haqidagi masalani o‘rganish uchun to‘g‘ri vaqtda kerakli joydamiz", — dedi CARPO asoschilaridan biri va bosh direktori Yan Xanrat.

Seminarning yakuniy qismida hamkorlikni mustahkamlash va qo‘shma loyihalarni ishlab chiqish bo‘yicha keyingi qadamlar muhokama qilindi. Ishtirokchilar atrof-muhit va iqlim bo‘yicha tashabbuslarni mintaqaviy rivojlanish strategiyalariga integratsiya qilish muhimligini ta’kidladilar. Shuningdek, barqaror rivojlanish amaliyotini tadqiq etish va joriy qilishni rag‘batlantirish maqsadida universitetlar, davlat idoralari va xususiy sektor o‘rtasida ko‘p tomonlama hamkorlikni yo‘lga qo‘yish g‘oyalari taklif etildi.