O‘zbekiston Respublikasi Ekologiya va iqlim o‘zgarishi milliy qo‘mitasi

Ma’lumot uchun: Yashil iqlim jamg‘armasi (YaIJ) tomonidan ajratilgan umumiy byudjeti 1,5 million AQSh dollari bo‘lgan mintaqaviy G2F loyihasini tayyorlash dasturi avval tasdiqlangan edi. Ushbu dastur doirasida Farg‘ona vodiysidagi Norin daryosi uchun batafsil tadqiqotlar va iqlim xavfini baholash amalga oshiriladi.

“OTBning qoʻllab-quvvatlashi va hamkorligi, shuningdek, mintaqaviy hamkorlikni mustahkamlash Markaziy Osiyo nufuzini oshirish va mintaqa manfaati yoʻlida iqlim oʻzgarishi va xavfsizlik muammolarini hal etishda muhim ahamiyatga ega. Tabiat chegara bilmaydi. Beshta davlat – bir ovoz, bir kun tartibi. Bu shunchaki bayonot emas! Aslida, biz hammamiz iqlim o'zgarishining salbiy ta'sirini, jumladan, iqlim migratsiyasi, suv tanqisligi, kam hosil va past daromad kabi muammolarni boshdan kechirmoqdamiz. Bizning birgalikdagi harakatlarimiz, loyiha va dasturlarimiz o‘zaro ishonch va hurmat muhitini, xalqaro hamkorlikni mustahkamlashga xizmat qiladi", – dedi A.Abduhakimov.

OTB G2F loyihasi turizm va iqtisodiyotning boshqa tarmoqlarini rivojlantirish salohiyatiga ega baland tog‘li qishloqlarni barqaror rivojlantirishga yo‘naltiriladi. OTB iqlim migratsiyasi xavfli hodisalar bilan chambarchas bog‘liqligini ta’kidladi va hozirda Ijtimoiy himoya milliy agentligi bilan birgalikda mamlakat bo‘ylab 9500 dan ortiq mahallaga ta’sir ko‘rsatadigan loyiha ko‘rib chiqilmoqda.

Uchrashuvda OTB mamlakatda iqlim o‘zgarishi bo‘yicha amalga oshirilayotgan joriy islohotlarni, xususan, O‘zbekiston Respublikasi Prezidenti huzuridagi Iqlim Kengashi, Markaziy Osiyo atrof-muhit va iqlim o‘zgarishini o‘rganish universiteti ("Green University") tashkil etilgani, Orolboʻyi mintaqasida iqlim texnologiyalari xalqaro koʻrgazma-xabi, shuningdek, Oʻzbekistonning “Yashil shaharlar reytingi” (Uzbekistan’s Green Cities Rating) loyihasi doirasida erishilgan natijalarini yuqori baholadi. 

Shuningdek, nafaqat O‘zbekistonda, balki butun mintaqada ekologik, ijtimoiy-iqtisodiy va ilmiy-texnikaviy muammolarni hal etishga qodir malakali mutaxassislar tayyorlash muhim masala ekanligi alohida ta’kidlandi. O‘zbekistonda "Green University"ning ochilishi ekologik muammolarni hal etishda ta’limning muhim ekanligini isbotlaydi.

OTB iqlim oʻzgarishi boʻyicha kurs ishlab chiqish va "Green University"da tashkil etilgan iqlim rezidensiyasiga ekspertlarni jalb qilish doirasida tajriba almashishda yordam berishga tayyorligini bildirdi.