Toshkentdagi Inha universiteti o‘zining 10 yilligini nishonladi
2024-11-08 23:20:00 / Vazirlik yangiliklari
Bugun, 8-noyabr kuni tashkil etilgan ushbu tadbir universitet tarixini aks ettiruvchi videorolik bilan boshlandi va unda Toshkentda shahridagi Inha universitetining Koreya bilan madaniy va ilmiy hamkorlikning mustahkam ifodasiga aylangani namoyish etildi.
Marosimda Raqamli texnologiyalar vaziri Sherzod Shermatov, Koreya Respublikasidagi Inha Universiteti prezidenti Cho Myong Vu, Koreyaning O‘zbekistondagi elchisi Von Do Yon, Inha Universitetining ijrochi direktori Li Hva Sok va Toshkentdagi Inha Universiteti rektori Muzaffar Jalolov nutq so‘zlab, universitetning ahamiyati va bitiruvchilarining O‘zbekiston iqtisodiyotiga qo‘shayotgan hissasini ta’kidladilar.
Vazir Sh. Shermatov nutqi davomida universitetning Koreya kompaniyalari bilan hamkorlik ramziga aylanganini hamda universitet bitiruvchilari Koreya va boshqa xalqaro kompaniyalar tomonidan yuqori malakali kadrlar sifatida tan olinayotganini qayd etdi.
“Universitetning 10 yillik faoliyati davomida o‘z oldiga qo‘ygan yuksak maqsadlari amalga oshdi. Inha nafaqat O‘zbekiston, balki Markaziy Osiyodagi eng yaxshi universitetlardan biriga aylandi. Ushbu universitet bitiruvchilari mamlakat IT kompaniyalarida yuqori talabga ega bo‘lib, ular O‘zbekistonning IT markaziga aylanishi yo‘lida muhim rol o‘ynamoqda”, – dedi vazir.
Tadbir davomida universitetning muvaffaqiyatli bitiruvchilari – Aziza Artikxo‘jaeva, Aslxon Xoshimxo‘jaev, Rahima Nug‘manova va Muhammadsaid Mamasaidov o‘z muvaffaqiyatlari bilan o‘rtoqlashdilar. Ular o‘z tajribalaridan kelib chiqib, universitetda olingan bilimlar ularga yangi imkoniyatlar eshiklarini ochganini ta’kidlashdi. Shuningdek, xalqaro kompaniyalarda ishlayotgan bitiruvchilar Nuriddin Iminxo‘jayev, Darxonbek Mamataliev, Dilmurod Yangiboyev va Rustam Zokirov o‘z tabriklarini video orqali yo‘llab, universitetning xalqaro maydondagi nufuzini ko‘rsatdilar.
Ta’kidlash lozimki, o‘tgan 10 yil davomida Toshkentdagi Inha Universiteti 1900 dan ortiq mutaxassisni tayyorlab, ular global IT hamjamiyatining bir qismiga aylanishdi. Ularning 85 foizdan ortig‘i O‘zbekistonda faoliyat olib borib, mamlakatda raqamli transformatsiya va axborot texnologiyalari rivojiga sezilarli hissa qo‘shmoqda. Qolganlari esa Google, Microsoft va Amazon kabi yirik xalqaro kompaniyalarda faoliyat yuritib, universitet va uning qadriyatlarini dunyo miqyosida namoyish etmoqdalar.