“IT ta’lim va frilansing” forumi bo‘lib o‘tdi
2024-09-19 19:35:00 / Vazirlik yangiliklari
Forum yoshlarni IT sohasidagi karyerasini yangi bosqichga olib chiqishga yordam berish hamda ularni IT sohasidagi eng so'nggi ta'lim tendensiyalari bilan tanishtirish maqsadida tashkil etildi. 5 ta dinamik seansda bilim, networking yana qimmatbaho sovg'alar bilan boyitilgan forumda 700 dan ortiq yoshlar IT sohasining katta tajriba ega mutaxassislar bilan suhbatlar, savol-javob hamda panel muhokamalarida faol ishtirok etdi.
“Coursera” kompaniyasining Hindiston va Osiyo-Tinch okeani bo‘yicha boshqaruvchi direktori Raghav Gupta, CompTIA vitse-prezidenti Jason Moss kabi yirik mustaqil ta’lim platformalarining vakillari ishtirok etdi. IT ekspertlar Sun’iy intellekt davrida ish va ta’lim hamda IT-sektorida yoshlar bandligini ta’minlashda IT sertifikatlarining o‘rni haqida qimmatli bilimlari bilan o‘rtoqlashdi. “Gem Space” kompaniyasi boshqaruvchi direktori Jordan Michael Alexis ta’lim va inson kapitaliga investitsiyalarni jalb qilish hamda “GemSoft” mahsulotlari O‘zbekistonga Markaziy Osiyo mamlakatlari orasida texnologiya eksporti bo‘yicha yetakchilikka qanday hissqa qo‘shishi mumkinligi haqida chiqish qildi.
Forum doirasida Xalqaro qo‘mita, Informatika bo‘yicha Xalqaro Olimpiada (IOI) va Informatika bo‘yicha Yevropa Qizlar Olimpiadasi (EGOI) a’zosi Eljakim Schrijvers Uchrashuvda xalqaro IT-olimpiadalar hamda ularda munosib ishtirok etish uchun nimalarni bilish lozimligi haqida ma'lumot berdi. IT sohasida xorijda ishlab kelayotgan vatandoshlarimiz Azimjon Pulatov, Sohibxon Salixov, Orzumand Xodievlar muvaffaqiyatli IT karyera qurishdagi tajribalari haqida video murojaat yo‘llashdi.
Forumning yirik bir yangiligi bu Raqamli ta’limni rivojlantirish markazi tomonidan muvofiqlashtiruvchi “IT iste’dod” loyihasi bo‘lib, u O‘zbekistondagi xususiy ta’lim sektorni qo‘lab-quvvatlash orqali yoshlarni xorijiy IT bozoriga olib chiqishni reja qilgan. “CRM va ERP tizimlaridan foydalanish va subsidiya olish tartibi” haqidagi taqdimotda loyihaning afzalliklari hamda IT bozor tahliliga to‘xtalindi.
“IT iste’dod” dasturi – IT Park rezidenti bo‘lgan IT-xizmatlarni eksport qiluvchi kompaniyalarga yuqori malakali mutaxassislarni tayyorlab beruvchi nodavlat ta’lim tashkilotlari faoliyatini rivojlantirish hamda kengaytirishni rag‘batlantirishga qaratilgan loyiha sanaladi. Qarorga ko‘ra, nodavlat ta’lim tashkilotlariga bitiruvchisi IT-xizmatlarni eksport qiluvchi tashkilotga ishga joylashganda bazaviy hisoblash miqdorining 75 baravarigacha ya’ni 25 milliongacha, nogironligi bo‘lgan yosh bitiruvchisi ishga joylashganda esa 105 baravarigacha ya’ni 35 milliongacha bir martalik subsidiya ajratiladi.
Forum doirasida xususiy IT ta’lim markaziga IT Talents dasturining ilk subsidiyasi topshirildi. Birinchi subsidiya chekini eng ko‘p bitiruvchilarini ishga joylagani uchun “UPro learning” o‘quv markazi oldi. Shuningdek, CRM sistemasidagi yaxshi ko‘rsatkichlari uchun qator o‘quv markazlari taqdirlandi. Respublikadagi eng yetakchi o‘quv markazlari sifatida “Mohirdev”, “Najot ta’lim”, “Astrum IT akademiyasi, bitiruvchilari ish bilan ta’minlanishi bo‘yicha eng yaxshi IT ta’lim markazi etib “PDP academy” taqdirlandi.
Yevropa qizlar olimpiadasida bronza medali sovrindori Zarnigor Raximovaga Toshkent shahridagi Amity universitetida ta’lim olish uchun 4 yillik grant taqdim etildi.
Shuningdek, forum doirasida “Al-Xorazmiy vorislari loyihasi”ning eng yaxshi natija ko‘rsatgan 10 nafar mentorlariga pul mukofoti topshirildi.