Chortoq tumanida kitobsevarlar uchun yana bir zamonaviy kutubxona foydalanishga topshirildi
2026-07-09 14:35:00 / Yangiliklar
Chortoq tumanida kitobxonlik madaniyatini yuksaltirish, aholining, ayniqsa, yoshlarning boʻsh vaqtini mazmunli tashkil etish va mutolaaga boʻlgan qiziqishini yanada oshirishga xizmat qiladigan navbatdagi maʼrifat maskani faoliyat boshladi.
Bugun "Yoshlar kuni" doirasida Zafar Diyor nomli mahallada barpo etilgan "Maʼrifat" kutubxonasining tantanali ochilish marosimi boʻlib oʻtdi.
Unda Namangan viloyati prokurorining oʻrinbosari Sanjarbek Ismoilov, Nodirabegim nomidagi viloyat axborot-kutubxona markazi direktori Dilfuza Hakimova, tuman hokimligi, huquqni muhofaza qiluvchi organlar rahbarlari, shoir va yozuvchilar, yosh kitobxonlar hamda keng jamoatchilik vakillari ishtirok etdi.
Ramziy lenta qirqilib, maskanda kitobxonlar uchun yaratilgan sharoitlar bilan tanishildi.
Mahalliy tadbirkorning shaxsiy mablagʻlari hisobidan qariyb 1 milliard soʻm evaziga barpo etilgan ikki qavatli kutubxona 20 ming nusxadan ortiq kitob fondiga hamda 65 oʻrinli zamonaviy oʻquv zaliga ega.
Bu yerda kitob mutolaasi, izlanish va bilim olish uchun barcha qulay shart-sharoitlar yaratilgan.
Eng muhimi, kutubxonadan foydalanishda yosh boʻyicha hech qanday cheklov yoʻq. Barcha kitobsevarlar ushbu maskanda erkin mutolaa qilishi, bilim va dunyoqarashini boyitishi mumkin boʻladi.
Yangi kutubxona nafaqat kitob oʻqish maskani, balki yoshlarning boʻsh vaqtini mazmunli tashkil etish, ularda kitobxonlik madaniyatini yuksaltirish, maʼnaviy kamolot va intellektual salohiyatni rivojlantirishga xizmat qiladigan muhim maʼrifat oʻchogʻi sifatida faoliyat yuritadi.