🔰 Kosonsoyda tomorqadan unumli foydalanish — daromadni oshirishning muhim omili
2026-08-17 10:50:00 / Yangiliklar
▫️Kosonsoy tumanida aholi tomorqa yer maydonlaridan samarali foydalanish, birinchi ekindan boʻshagan yerlarga takroriy ekinlar ekish, aholi bandligini taʼminlash, xonadonlar daromadini oshirish hamda qishloq xoʻjaligi mahsulotlari yetishtirishni koʻpaytirish masalalariga bagʻishlangan viloyat seminari oʻtkazildi.
Seminarda viloyat qishloq xoʻjaligi boshqarmasi boshligʻining oʻrinbosari N.Xudoyberdiyev, Kambagʻallikni qisqartirish va bandlik bosh boshqarmasi boshligʻining birinchi oʻrinbosari A.Turdiboyev, tuman hokimi D.Qodirov, mahalla raislari va hokim yordamchilari ishtirok etdi.
Tadbir tumandagi “Ravot” mahallasining “Mustaqillik” koʻchasidagi xonadonlarda tashkil etildi. Unda tomorqadan yil davomida samarali foydalanish, birinchi ekindan boʻshagan maydonlarga takroriy ekinlar ekish, shuningdek, xonadonlarda chorvachilik, parrandachilik va sabzavotchilikni rivojlantirish boʻyicha amaliy tajribalar namoyish etildi.
Xususan, “Mustaqillik” koʻchasida yashovchi Qurbonali Meliboyev xonadonidagi chorvachilik faoliyati ishtirokchilarda katta qiziqish uygʻotdi. Qurbonali uch yildan buyon chorvachilik bilan shugʻullanib kelmoqda. Ayni paytda xonadonda 10 bosh zotli qoramol, jumladan, Angus, Simmental, Gereford va Limuzin zotlari parvarishlanmoqda. Chorvachilik oila uchun barqaror daromad manbaiga aylangan.
Shuningdek, mahallada birinchi ekin hosili yigʻib olinganidan soʻng boʻshagan yer maydonlariga takroriy ekinlar ekilayotgani koʻrsatib berildi. Bu esa yerdan yana bir bor unumli foydalanish, qoʻshimcha hosil yetishtirish va ortiqcha mahsulotlarni sotish orqali xonadonlar daromadini oshirish imkonini bermoqda.
Seminar yakunida tomorqalardan samarali foydalanish, takroriy ekinlar ekishni kengaytirish, chorvachilik, parrandachilik va sabzavotchilikni rivojlantirish hamda ilgʻor tajribalarni boshqa mahallalarda ommalashtirish boʻyicha vazifalar belgilab olindi.@NamanganBandlik