Jizzax viloyati Kambag‘allikni qisqartirish va bandlik boshqarmasi

Xotin-qizlar bandligini ta’minlash maqsadida har bir mahallaga 24 million so‘mdan subsidiya ajratilgan. Forishning 24 ta, Do‘stlikning 12 ta mahallasi ushbu imkoniyatdan samarali foydalanib, 100 nafardan ortiq xotin-qizni ish bilan ta’minlagan. 10 фотографий Jizzax viloyati hokimi Ulug‘bek Mustafoyev rahbarligida oila va xotin-qizlar sohasida amalga oshirilayotgan ishlar, mavjud muammolar hamda ularni bartaraf etish choralari tanqidiy-tahliliy ruhda muhokama qilindi. Yig‘ilishda xotin-qizlar bandligini ta’minlash, ularni kasb-hunarga o‘qitish, oilaviy ajrimlarning oldini olish, voyaga yetmaganlar o‘rtasida erta tug‘ruq va jinoyatchilik profilaktikasi bo‘yicha ayrim hududlarda ishlar talab darajasida emasligi keskin tanqid qilindi. Viloyatdagi 29,3 ming nafar ishsiz fuqaroning 15,7 ming nafari, ya’ni 53 foizi xotin-qizlardir. Ayniqsa, Sharof Rashidov, Zomin, G‘allaorol, Baxmal tumanlari va Jizzax shahrida ishsiz ayollar soni yuqori. Xotin-qizlar bandligini ta’minlash maqsadida har bir mahallaga 24 million so‘mdan subsidiya ajratilgan. Forishning 24 ta, Do‘stlikning 12 ta mahallasi ushbu imkoniyatdan samarali foydalanib, 100 nafardan ortiq xotin-qizni ish bilan ta’minlagan. Biroq Sharof Rashidov, Baxmal, Zafarobod va Zomin tumanlarining qator mahallalarida mablag‘lardan deyarli foydalanilmagan. Yangiobod tumanida esa birorta mahallada belgilangan ko‘rsatkich bajarilmagan. Shu munosabat bilan mas’ullarga mavjud imkoniyatlar nega to‘liq ishga solinmayotgani yuzasidan tanqidiy savollar qo‘yildi. Har bir xotin-qizning muammosini xonadonbay o‘rganib, uni ish bilan ta’minlash bo‘yicha aniq natijaga erishish vazifasi belgilab berildi. Xotin-qizlarni kasb-hunar va tadbirkorlikka o‘qitishda ham kamchiliklar mavjud. 10,6 ming nafarni o‘qitish rejalashtirilgan bo‘lsa, amalda 4,9 ming nafari qamrab olingan, xolos. Bu 46 foizni tashkil etadi. Ayrim mahallalarda esa ushbu yo‘nalishdagi ishlar deyarli tashkil etilmagan. Mas’ullarga 10 kun muddatda o‘qitish grafiklarini qayta ko‘rib chiqib, xotin-qizlarni kasb-hunar o‘quv markazlariga to‘liq qamrab olish topshirildi. Yig‘ilishda oilaviy ajrimlar masalasi ham jiddiy tanqid qilindi. Joriy yilda viloyatda 1 282 ta ajrim qayd etilgan bo‘lib, bu o‘tgan yilga nisbatan 162 taga yoki 14,5 foizga ko‘p. Mirzacho‘lda ajrimlar 20 taga, Zafarobodda 15 taga, Sharof Rashidov tumanida 44 taga, Jizzax shahrida esa 35 taga ko‘paygan. Mirzacho‘l tumani G‘alaba mahallasida mazkur ko‘rsatkich o‘tgan yilga nisbatan 4 barobar oshgan. Topshiriqqa ko‘ra, “qizil” toifadagi mahallalarda har bir muammoli oila bo‘yicha alohida “yo‘l xaritasi” ishlab chiqilib, manzilli ishlash yo‘lga qo‘yiladi. Sudga ajrashish bo‘yicha ariza berilganidan boshlab mahalla yettiligi va yarashtirish komissiyalarini faol jalb etish vazifasi belgilandi. Voyaga yetmaganlar o‘rtasida erta tug‘ruq holatlari ham jiddiy tanqid qilindi. Joriy yilning 8 oyida 15–17 yoshli qizlar o‘rtasida 18 ta holat qayd etilgan. Shundan 8 tasi Paxtakor tumaniga to‘g‘ri keladi. Mas’ullarga erta tug‘ruqning oldini olish bo‘yicha manzilli profilaktika ishlarini kuchaytirish, 14–17 yoshli qizlarni chuqurlashtirilgan tibbiy ko‘rikdan o‘tkazish bo‘yicha reja ishlab chiqish topshirildi. Ayollar jinoyatchiligi 50 foizga — 22 tadan 11 taga kamaygani ijobiy natija sifatida qayd etildi. Biroq ayrim hududlarda bunday holatlar saqlanib qolayotgani sababli profilaktika ishlarini susaytirmaslik, nuroniylar, mahalla imomlari va otinoyilarni ham bu jarayonga faol jalb etish vazifasi belgilandi. Yig‘ilish yakunida mas’ullarga sohadagi muammolarni qog‘ozdagi hisobotlar bilan emas, har bir xonadon va har bir inson taqdiri misolida o‘rganib, amaliy natijaga ishlash talabi qo‘yildi.