Mahallalarda bandlik va tadbirkorlikni rivojlantirish bo‘yicha yangi tizim joriy etiladi
2026-07-16 19:45:00 / Yangiliklar
Mahallalarda bandlik va tadbirkorlikni rivojlantirish bo‘yicha yangi tizim joriy etiladi
Prezidentimiz Shavkat Mirziyoyev raisligida mahallalarga yangi muhit olib kirish hamda “mahalla yettiligi” faoliyatini yangicha tashkil etish masalalariga bag‘ishlangan videoselektor yig‘ilishi bo‘lib o‘tmoqda.
Davlatimiz rahbari bu yil infratuzilmani yaxshilash, odamlar va tadbirkorlar uchun sharoit yaratish maqsadida tumanlarga o‘rtacha 250 milliard so‘mdan, mahallalarga esa 5,5 milliard so‘mdan mablag‘ berilganini ta’kidladi.
Yig‘ilishda aholi bandligini ta’minlash, daromadlarini oshirish va tadbirkorlikni qo‘llab-quvvatlash bo‘yicha qator muhim vazifalar belgilandi.
Mahallalarda ishni samarali tashkil etish maqsadida Mahallani rivojlantirish milliy instituti tashkil etilib, u “mahalla yettiligi” faoliyatini metodik qo‘llab-quvvatlaydi va muammolarga ilmiy yechimlar ishlab chiqadi.
Oilaviy tadbirkorlik loyihalari uchun qo‘shimcha 2 trillion so‘m imtiyozli mablag‘ ajratildi. “Og‘ir” mahallalarda kredit stavkasi 17,5 foizdan 12 foizga tushirildi. 1-avgustdan mahalla bankirlari o‘zlari aniqlagan loyihalarni ushbu mablag‘lar orqali moliyalashtira oladi.
Mahalla bankirlari faoliyati endilikda tadbirkorlikni rivojlantirish, yangi ish o‘rinlari yaratish va aholi daromadini oshirish natijalari bo‘yicha baholanadi.
Yil davomida eng ko‘p tadbirkorlarni ro‘yxatga olgan, eng ko‘p yangi ish o‘rni yaratgan va eng yaxshi natija ko‘rsatgan 200 ta mahallaga 2 milliard so‘mdan mukofot beriladi.
Shuningdek, samarali faoliyat yuritib, yaxshi tajriba yaratgan “mahalla yettiligi” ham rag‘batlantiriladi. Ularning ish uslubi boshqa hududlarda ommalashtiriladi, ilg‘or tajribalar keng yoritib boriladi.
Hozirda “yettilik” orqali 100 ga yaqin xizmat ko‘rsatilmoqda. Endi barcha davlat xizmatlari bosqichma-bosqich mahallaga tushiriladi.
“Mahalla – xalqqa eng yaqin boshqaruv bo‘g‘ini. Odamlarning kundalik masalalari shu yerning o‘zida, ortiqcha ovoragarchiliksiz hal bo‘lishi kerak”,
– dedi Prezidentimiz.