Buxoro shahar hokimligi

Yig‘ilishda, avvalo, mahallalarda aholi xonadonlarini xatlovdan o‘tkazish jarayonlari, oilalarning ijtimoiy-iqtisodiy holatini o‘rganish, mavjud muammolarni manzilli aniqlash va har bir xonadonning “ijtimoiy-iqtisodiy portreti”ni shakllantirish masalalari muhokama qilindi.

Xatlov jarayonida mehnatga layoqatli, ammo doimiy daromad manbaiga ega bo‘lmagan fuqarolarni aniqlash, ularni doimiy va mavsumiy ish o‘rinlariga joylashtirish, kasb-hunarga o‘qitish, tadbirkorlikka jalb etish hamda o‘zini o‘zi band qilish imkoniyatlarini kengaytirish bo‘yicha aniq chora-tadbirlarni belgilash zarurligi qayd etildi.

Shuningdek, “mahalla yettiligi” faoliyatini samarali tashkil etish, xatlov natijalarini yagona ma’lumotlar bazasiga kiritish, ehtiyojmand oilalarni aniqlash va ular bilan individual ishlash, kambag‘allikdan chiqarish bo‘yicha manzilli va individual yondashuvni kuchaytirish masalalariga alohida e’tibor qaratildi.

Mas’ullarga xatlov jarayonlarini sifatli va to‘liq yakunlash, aniqlangan har bir muammo bo‘yicha “xonadonbay”, “fuqarobay” va “mahallabay” ishlash tizimi asosida amaliy choralar ko‘rish, aholini daromadli mehnatga jalb etish hamda kambag‘allikdan chiqarish bo‘yicha belgilangan vazifalar ijrosini ta’minlash topshirildi.