Energiya tejamkor texnologiyalar asosida 33-umumta'lim maktab rekonstruksiya qilinmoqda
2026-08-06 10:50:00 / Yangiliklar
1176 o‘quvchi o‘rniga mo‘ljallangan ta'lim maskanida olib borilayotgan qurilish-ta'mirlash ishlari natijasida bino zamonaviy me'moriy yechimlar, energiya samaradorligi yuqori bo‘lgan muhandislik-kommunikatsiya tizimlari hamda qulay ta'lim muhiti bilan ta'minlanadi. Loyiha doirasida bino konstruksiyalari mustahkamlanib, ichki va tashqi pardozlash ishlari, tom qoplamasi, isitish, elektr ta'minoti, suv va kanalizatsiya tarmoqlari yangilanmoqda.
Obyektda qurilish-montaj ishlari "Qoraun inshoot qurilish" MChJ tomonidan sifat va belgilangan me'yorlar asosida olib borilmoqda. Ayni paytda qurilish maydonida 15 ta brigada tarkibida 150 nafardan ortiq malakali ishchi-xodim mehnat qilmoqda. Mutaxassislar tomonidan barcha texnologik jarayonlar tasdiqlangan loyiha-smeta hujjatlari hamda amaldagi qurilish me'yorlari va qoidalari asosida amalga oshirilmoqda.
Mazkur ijtimoiy ahamiyatga ega loyihaning umumiy qiymati 23 milliard 664 million so‘mni tashkil etadi. Loyihaning foydalanishga topshirilishi natijasida o‘quvchilar va pedagoglar uchun zamonaviy, xavfsiz, energiya tejamkor hamda qulay ta'lim muhiti yaratilib, ta'lim sifatini yanada oshirishga xizmat qiladi.