Buxoro shahar hokimligi

Mahalla fuqarosi Avezova Samiya tomonidan xonadon sharoitida mavsumiy konservalangan oziq-ovqat mahsulotlari ishlab chiqarish yo‘lga qo‘yilgan bo‘lib, bugungi kunda ushbu faoliyat nafaqat iste'molchilarni sifatli va tabiiy mahsulotlar bilan ta'minlayotgani, balki yangi ish o‘rinlari yaratish orqali mahalladagi ijtimoiy-iqtisodiy faollikni ham oshirmoqda.

Ayni paytda mazkur ishlab chiqarish jarayonida 5 nafar mavsumiy ishchi mehnat qilmoqda. Ularning har biriga kuniga 100 ming so‘m miqdorida mehnat haqi to‘lanayotgani fuqarolarning daromad manbalarini kengaytirish va mavsumiy bandligini ta'minlashda muhim ahamiyat kasb etmoqda.
Fuqaro bilan o‘tkazilgan muloqot davomida ishlab chiqarish quvvatini kengaytirish, mahsulot assortimentini boyitish hamda tadbirkorlik faoliyatini yanada rivojlantirish maqsadida imtiyozli tadbirkorlik kreditlari va davlat tomonidan yaratilgan qo‘llab-quvvatlash mexanizmlaridan samarali foydalanish yuzasidan tavsiyalar berildi.
E'tiborlisi, Avezova Samiya faoliyatini yanada kengaytirish orqali qo‘shimcha ish o‘rinlari yaratish rejasini bildirar ekan, mahalladagi ish izlayotgan fuqarolarni ushbu ish o‘rinlariga jalb etishga tayyorligini ham ma'lum qildi. Bu esa xususiy tashabbus va mahalla hamkorligining amaliy natijasi sifatida e'tirof etiladi.

Bugungi kunda "Hamid Olimjon" mahallasida 3 416 nafar aholi, 1 274 ta oila va 1 012 ta xonadon istiqomat qilmoqda. Hududda xizmat ko‘rsatish, oilaviy tadbirkorlik va hunarmandchilik yo‘nalishlari iqtisodiy drayver sifatida izchil rivojlanib, yangi biznes tashabbuslarini qo‘llab-quvvatlash, aholi bandligini oshirish va mahalla iqtisodiy salohiyatini yuksaltirishga xizmat qilmoqda.

Oilaviy tadbirkorlikni qo‘llab-quvvatlash, mahalliy ishlab chiqaruvchilar faoliyatini kengaytirish hamda yangi ish o‘rinlarini yaratish bo‘yicha amalga oshirilayotgan bunday tashabbuslar mahallalarning barqaror ijtimoiy-iqtisodiy rivojlanishiga, aholi farovonligini yuksaltirishga va "Inson qadri uchun" tamoyilining amaldagi ifodasiga aylanmoqda.