Buxoro shahar hokimligi

12–15-may kunlari davom etayotgan haftalik doirasida jurnalistlar, axborot xizmati xodimlari, blogerlar, mobilograflar hamda yosh kontent yaratuvchilar uchun turli yo‘nalishlarda mahorat darslari, seminar-treninglar va amaliy mashg‘ulotlar tashkil etilmoqda.

Tadbir davomida media sohasi vakillari tomonidan bugungi axborot makonidagi dolzarb masalalar, zamonaviy jurnalistika tamoyillari hamda raqamli kommunikatsiya yo‘nalishlari yuzasidan ma’ruzalar taqdim etildi.

Xususan, O‘zbekiston milliy axborot agentligi muxbiri Ikrom Avvalboyev gazeta va jurnallar bosh muharrirlari, muxbirlar hamda internet jurnalistikasi vakillari uchun “O‘zbekistondagi islohotlar jarayonini yoritishning muhim yo‘nalishlari”, “Ijtimoiy mas’uliyat, kasb etikasi va media qonunchiligi: risk, reputatsiya va strategik qarorlar” mavzularida ma’ruza qildi.

Shuningdek, Kontent markazi montaj ustasi Sardor Ma’murov hududiy telekanallarning tasvirchi va montajchilari uchun “Montaj jarayonida e’tibor qaratiladigan jihatlar: zamonaviy reportaj ritmi” mavzusida amaliy trening o‘tkazdi.

Kontent markazi mutaxassisi Ulug‘bek Kurbanbayev “Axborot sohasidagi faoliyatni tartibga soluvchi qonun hujjatlarining mazmun-mohiyati”, Dilnoza Qurbonova esa matbuot kotiblari va axborot xizmatlari rahbarlari uchun “OAV, blogosfera va inflyuyenserlar bilan hamkorlikni yo‘lga qo‘yish mexanizmlari” mavzusida taqdimotlar bilan ishtirok etdi.

Mashg‘ulotlar davomida ishtirokchilarga strategik kommunikatsiya, media etikasi va qonunchilik, faktcheking va axborotni verifikatsiya qilish, sun’iy intellektdan kontent tayyorlashda foydalanish, vizual storitelling, montaj hamda ijtimoiy tarmoq algoritmlari bilan ishlash bo‘yicha amaliy bilim va ko‘nikmalar berildi.

Qizg‘in bahs-munozaralar va interaktiv muloqotlarga boy tarzda o‘tayotgan “Media haftalik” 15-may kuniga qadar davom etadi.