Buxoro shahar hokimligi

Tadbir O‘zbekiston Respublikasi Davlat madhiyasi bilan boshlandi. Shundan so‘ng Qurbon Tursunov O‘zbekiston Respublikasi Prezidenti tomonidan mamlakatimiz maktab bitiruvchilariga yo‘llangan bayram tabrigini o‘qib eshittirdi. Davlatimiz rahbarining samimiy tilaklari va ezgu da’vatlari mustaqil hayot sari ilk qadam qo‘yayotgan yoshlar, ularning ota-onalari hamda fidoyi ustozlar tomonidan katta qiziqish va ko‘tarinki ruhda tinglandi.

Shahar hokimi o‘z so‘zida bugungi kunda yosh avlod uchun yaratilayotgan keng imkoniyatlar, zamonaviy ta’lim sharoitlari va davlatimiz tomonidan ko‘rsatilayotgan e’tibor haqida to‘xtalib, bitiruvchilarni ushbu imkoniyatlardan oqilona foydalanishga, bilim va salohiyatlarini Vatan ravnaqi yo‘lida safarbar etishga chorladi. Shuningdek, ularga kelgusi hayot yo‘lida ulkan zafarlar, omad va muvaffaqiyatlar tiladi.

Tadbir davomida bitiruvchilar ham so‘zga chiqib, ularga ta’lim-tarbiya bergan ustozlari hamda doimo qo‘llab-quvvatlab kelgan ota-onalariga minnatdorlik bildirib, ularning ishonchini oqlashga va’da berdilar.

Ma’lumot uchun, joriy yilda Buxoro shahridagi umumta’lim maktablarini 3705 nafar o‘quvchi tamomlamoqda. Ularning 302 nafari muddatidan avval talabalik baxtiga erishgan. Shuningdek, 86 nafar bitiruvchi oltin medal, 33 nafari esa kumush medal bilan maktabni tamomlamoqda. Xususan, 4-son umumta’lim maktabining 88 nafar bitiruvchisidan 10 nafari maktab partasidanoq talaba bo‘lishga muvaffaq bo‘lgan. Ularning 4 nafari nufuzli xorijiy oliy ta’lim muassasalariga o‘qishga qabul qilingan.

Tadbir yakunida Qurbon Tursunov ta’lim tizimini rivojlantirishga munosib hissa qo‘shib kelayotgan bir guruh pedagoglarga Buxoro shahar hokimligining tashakkurnomalari va esdalik sovg‘alarini topshirdi.

“So‘nggi qo‘ng‘iroq” tadbirida viloyat hokimining o'rinbosari Baxtiyor Adilov ham ishtirok etdi.

Bayram davomida ilm-ma’rifat, Vatanga muhabbat va fidoyilik g‘oyalarini tarannum etuvchi she’rlar, kuy-qo‘shiqlar hamda bitiruvchilar tomonidan tayyorlangan badiiy chiqishlar namoyish etildi. Maktab hovlisida yangragan “So‘nggi qo‘ng‘iroq” sadolari esa nafaqat bitiruvchilar, balki barcha ishtirokchilarga unutilmas taassurotlar ulashib, ularni yangi marralar sari ruhlantirdi.