“Zamondosh” — yoshlar iste’dodi va ma’naviyatini yuksaltirayotgan zamonaviy madaniyat maskani
2026-05-22 15:30:00 / Yangiliklar
O‘zbekiston Respublikasi Prezidentining 2020-yil 26-maydagi tegishli Farmoniga muvofiq, madaniyat va san’at sohasining jamiyat hayotidagi o‘rni va ta’sirini yanada oshirish, hududlarda madaniyat muassasalarining moddiy-texnik bazasini mustahkamlash hamda aholiga ko‘rsatilayotgan madaniy xizmatlar sifatini yaxshilash bo‘yicha keng ko‘lamli chora-tadbirlar belgilangan.
Mazkur farmon asosida 2021–2024-yillarda yangi quriladigan, rekonstruksiya qilinadigan, kapital ta’mirlanadigan va zamonaviy jihozlanadigan madaniyat markazlari ro‘yxati shakllantirilib, unga 4-son “Zamondosh” madaniyat markazi ham kiritildi. Shunga muvofiq, markaz binosi to‘liq rekonstruksiya qilinib, zamonaviy talablar asosida qayta ta’mirlandi hamda 2025-yilda foydalanishga topshirildi.
Qurilish-rekonstruksiya ishlari uchun jami 1 milliard 200 million so‘m mablag‘ yo‘naltirildi. Natijada markazning moddiy-texnik bazasi mustahkamlanib, yoshlarning bo‘sh vaqtini mazmunli tashkil etish hamda ularning ijodiy salohiyatini rivojlantirish uchun zarur shart-sharoitlar yaratildi.
Bugungi kunda markazda “Zamonaviy raqs”, “Milliy raqs”, “Bolalar folklori”, “Tasviriy san’at”, “Zarb doirachilar”, “Milliy kashtachilik” hamda “Nutq madaniyati” yo‘nalishlarida to‘garaklar faoliyat yuritmoqda. Ushbu to‘garaklarga 310 nafardan ortiq yoshlar muntazam ravishda qatnashib kelmoqda.
Shuningdek, markaz huzurida faoliyat olib borayotgan “La’li estrada va sirk” xalq jamoasi turli madaniy-ma’rifiy tadbirlar, festival va konsert dasturlarida munosib ishtirok etib, tomoshabinlar e’tirofiga sazovor bo‘lmoqda.
Markaz qoshidagi ijodiy jamoalar va to‘garak a’zolari viloyat hamda respublika miqyosida o‘tkazilayotgan ko‘rik-tanlov va festivallarda faol qatnashib, yuqori natijalarni qo‘lga kiritmoqda.
Ayni paytda madaniyat markazi hududdagi 20 ga yaqin mahalla fuqarolar yig‘inlari, umumta’lim maktablari hamda oliy ta’lim muassasalari bilan yaqindan hamkorlik olib borib, yoshlarning madaniy-ma’naviy tarbiyasi, estetik dunyoqarashi va ijodiy qobiliyatlarini rivojlantirishga munosib hissa qo‘shmoqda.