Buxoro shahar hokimligi

Mahallada bugungi kunda 3480 nafar aholi istiqomat qiladi. 1342 ta oila va 1241 ta xonadon mavjud bo‘lib, asosiy rivojlanish yo‘nalishi savdo va xizmat ko‘rsatish sohasi hisoblanadi. Ushbu yo‘nalishda faoliyat yuritayotgan tadbirkorlar nafaqat o‘z daromadlarini oshirmoqda, balki yangi ish o‘rinlari yaratish orqali mahalla aholisining farovonligini ta’minlashga ham hissa qo‘shmoqda.

Shunday tashabbuskor tadbirkorlardan biri — Anvar Aminovdir. U ijaraga joy olib, o‘z faoliyatini yo‘lga qo‘ygan va bugungi kunda buyurtma asosida kastyum-shimlar tikish bilan shug‘ullanmoqda. Anvar Aminov hunarmand sifatida Hunarmand uyushmasiga a’zo bo‘lib, o‘z ishini nafaqat biznes sifatida, balki kasb o‘rgatish maktabi sifatida ham rivojlantirib kelmoqda.

Tadbirkor dastlab ishchilarini shogirdlik asosida qabul qilib, ularga hunar sirlarini o‘rgatgan. Natijada ularni barqaror daromad manbaiga ega qilib, ish bilan ta’minlagan. Hozirgi kunda uning korxonasida 6 nafar ishchi faoliyat yuritmoqda va u yana 5 nafar shogirdga kasb o‘rgatmoqda. Ishchilarga o‘rtacha 5–6 million so‘m oylik maosh to‘lanadi. Korxonaning oylik sof foydasi esa 10–15 million so‘mni tashkil etadi.

Bu kabi tashabbuslar nafaqat tadbirkorning o‘z faoliyatini kengaytirishiga, balki mahalladagi yoshlarni kasbga yo‘naltirish, ularni band qilish va ijtimoiy barqarorlikni mustahkamlashga xizmat qilmoqda.