Buxoro shahar hokimligi

Sessiya davomida Buxoro shahrida 2025 yil mobaynida yoshlar siyosati sohasida amalga oshirilgan ishlar yuzasidan mas’ul mutasaddilarning hisobotlari eshitildi. Ta’kidlanganidek, yoshlarni har tomonlama qo‘llab-quvvatlash, ularning bandligini ta’minlash, tadbirkorlik tashabbuslarini rag‘batlantirish, ta’lim va ma’naviy-ma’rifiy yo‘nalishlardagi loyihalarni kengaytirish borasida tizimli ishlar olib borilgan.

Shuningdek, Sanitariya-epidemiologik osoyishtalik va jamoat salomatligi Buxoro shahar bo‘limi tomonidan 2025 yilda amalga oshirilgan ishlar to‘g‘risidagi hisobot ham eshitildi. Hisobotda aholi salomatligini muhofaza qilish, sanitariya holatini yaxshilash, profilaktik tadbirlarni kuchaytirish, epidemiologik barqarorlikni ta’minlash borasida amalga oshirilgan chora-tadbirlar xususida batafsil ma’lumot berildi.

Sessiya kun tartibidagi yana bir muhim masala — Xalq deputatlari shahar Kengashi huzuridagi yoshlar maslahat guruhi tarkibiga o‘zgartirish kiritish masalasi bo‘ldi. Unga ko‘ra, guruh faoliyati samaradorligini yanada oshirish, yoshlarning taklif va tashabbuslarini keng jalb etish maqsadida tarkibiy o‘zgartishlar kiritildi.

Shu bilan bir qatorda, Xalq deputatlari Buxoro shahar Kengashi va Kengash doimiy komissiyalarining 2026 yil uchun mo‘ljallangan ish rejalari muhokama qilinib, tasdiqlandi. Yangi ish rejalarida shaharni ijtimoiy-iqtisodiy rivojlantirish, aholi farovonligini oshirish, ochiqlik va shaffoflikni ta’minlashga qaratilgan aniq vazifalar belgilab berildi.

Sessiya yakunida ko‘rib chiqilgan barcha masalalar yuzasidan tegishli qarorlar qabul qilinib, belgilangan vazifalar ijrosini ta’minlash yuzasidan chora-tadbirlar belgilandi.