“Xo‘ja G‘unjoriy” mahallasida xotin-qizlar bandligini ta’minlashga qaratilgan tadbirkorlik tashabbuslari
2026-02-12 15:30:00 / Yangiliklar
Mahallada faoliyat yuritayotgan yetakchi tadbirkorlardan biri — Jasmina Yusupova bo‘lib, u davlat tomonidan ajratilgan 120 million so‘m miqdoridagi imtiyozli kredit mablag‘lari hisobiga to‘y va marosimlar uchun xizmat ko‘rsatuvchi “Jasmin” sarpo do‘konini tashkil etdi. Mazkur savdo nuqtasida milliy va zamonaviy sarpolar ishlab chiqarilib, aholiga taklif etilmoqda. Eng muhimi, ushbu tadbirkorlik loyihasi doirasida 11 nafar xotin-qizning doimiy bandligi ta’minlandi. Ishchilarga mehnat samaradorligi va bajarilgan ish hajmiga qarab ish haqi to‘lanishi yo‘lga qo‘yilgan.
Shuningdek, mahallada yashovchi yana bir tashabbuskor ayol — Dilafruz Zakirova tomonidan uy sharoitida tikuvchilik sexi tashkil etilgan. Ushbu sexda 8 nafar xotin-qiz ish bilan ta’minlanib, buyurtmalar asosida milliy va zamonaviy liboslar tayyorlanmoqda. Tadbirkorning mehnatsevarligi va mahsulotlar sifati natijasida mijozlar ishonchi mustahkamlanib bormoqda.
Yana bir ibratli tajriba Azima Halimovaning faoliyati bilan bog‘liq. U nonvoychilik yo‘nalishida oilaviy tadbirkorlikni yo‘lga qo‘yib, yashash manzilida novvoyxona tashkil etgan. Bugungi kunda mazkur novvoyxonada 5 nafar ishsiz fuqaroning bandligi ta’minlangan bo‘lib, har bir ishchiga oyiga 2 million so‘m miqdorida barqaror ish haqi to‘lanmoqda. Bu kabi tashabbuslar mahallada ijtimoiy himoyani kuchaytirishda muhim ahamiyat kasb etmoqda.
Umuman olganda, mahalladagi tadbirkor ayollar o‘z mehnati va hunari orqali nafaqat aholi ehtiyojlarini qondirib, balki barqaror daromad manbaiga ega bo‘lib kelmoqda. Shubhasiz, har qanday kasb va hunar mashaqqatli mehnat, sabr-toqat va qat’iyatni talab etadi.
“Xo‘ja G‘unjoriy” mahallasida amalga oshirilayotgan bunday tadbirkorlik tashabbuslari xotin-qizlar bandligini oshirish, aholi farovonligini ta’minlash hamda mahallaning ijtimoiy-iqtisodiy rivojiga munosib hissa qo‘shmoqda.