Buxoro shahar hokimligi

Tadbirda Buxoro shahar hokimi Qurbon Tursunov, viloyat sog‘liqni saqlash boshqarmasi boshlig‘i Elyor Oltiyev, tibbiyot xodimlari, talaba yoshlar ishtirok etdi. Tadbirda Qurbon Tursunov hamda Elyor Oltiyey so‘zga chiqib, marafonning ahamiyati, uning aholi salomatligini muhofaza qilishdagi o‘rni, hamkorlikdagi tashkilotlarning birgalikdagi harakati xususida to‘xtalishdi. Tadbir doirasida bir oy davomida marafonda faol ishtirok etgan tibbiyot markazlari va hamkor tashkilotlarga tashakkurnomalar va qimmatbaho sovg‘alar topshirildi.

Ma’lumot o‘rnida ta’kidlash joizki, “Salomatlik marafoni” ikki bosqichda Buxoro shahridagi 11 ta oilaviy poliklinika hamda ko‘p tarmoqli markaziy poliklinikada tashkil etildi. Marafon doirasida poliklinikalarda 18 turdagi laborator va 29 turdagi instrumental tekshiruvlar o‘tkazilishi uchun zamonaviy tibbiy asbob-uskunalar jalb etildi. Jumladan, 1 tadan mobil mammograf va angiograf faoliyati yo‘lga qo‘yildi.

Shuningdek, Buxoro davlat tibbiyot instituti professor-o‘qituvchilari hamda viloyat muassasalarining 18 ta yo‘nalishdagi yetakchi mutaxassislari ishtiroki ta’minlandi. Aholi uchun 7 turdagi tibbiy ko‘riklar va surunkali kasalliklar bo‘yicha tekshiruvlar bemor marshrutlari asosida amalga oshirildi.

Kechiktirib bo‘lmaydigan holatlar uchun 34 turda, kunduzgi shifoxona va fizioterapiya xizmati uchun 6 turda tibbiy yordamlar ko‘rsatildi. Shu bilan birga, aholiga bepul taqdim etiladigan 82 turdagi dori vositalari hamda 62 turdagi tibbiy buyum va sarflov vositalari bilan ta’minlash ishlari amalga oshirildi.

Marafon davomida Buxoro shahridagi ko‘p tarmoqli markaziy poliklinika va 11 ta oilaviy poliklinikaga jami 77 268 nafar aholi murojaat qilib, 206 780 ta qabul amalga oshirildi. Buxoro davlat tibbiyot instituti professor-o‘qituvchilari va viloyat muassasalarining 18 ta yo‘nalishdagi 18 nafar yetakchi mutaxassislari tomonidan markaziy poliklinikaga yo‘naltirilgan 1 664 nafar fuqaro chuqur tibbiy ko‘riklardan o‘tkazildi. Ularning 413 nafariga stasionar, 1 251 nafariga esa ambulator davolanish tavsiya etildi.

Ahamiyatli jihati shundaki, 841 nafar kambag‘al oila a’zolaridan 839 nafari, ya’ni 99,7 foizi tibbiy ko‘riklar bilan to‘liq qamrab olindi. Ularning 173 nafari bolalardan iborat. Shuningdek, 187 nafar nogironligi bo‘lgan shaxslar tibbiy ko‘riklardan o‘tkazilib, ularning 56 nafari 18 yoshgacha bo‘lgan bolalardir.

Bundan tashqari, 153 nafar baynalminal jangchilar, 26 nafar CHAES qatnashchilari, 7 nafar 1941–1945 yillar urush qatnashchilari, nogironlari va ularga tenglashtirilgan shaxslar ham tibbiy ko‘riklar bilan qamrab olindi. Turli kasalliklar aniqlangan 186 nafar fuqaroning 180 nafariga ambulator, 6 nafariga esa stasionar davolanish tavsiya etildi.

“Salomatlik marafoni” Buxoro shahri aholisi o‘rtasida sog‘lom turmush tarzini targ‘ib etish, kasalliklarni erta bosqichda aniqlash va aholiga sifatli tibbiy xizmat ko‘rsatish yo‘lida muhim amaliy tadbir sifatida yuqori baholandi.

Tadbir yakunida ishtirokchilar va mehmonlar uchun bayramona ruhda konsert dasturi tashkil etildi. Unda san’atkorlar tomonidan kuy-qo‘shiqlar ijro etildi, shuningdek, harbiylar hamda sportchi yoshlar tomonidan vatanparvarlik va sog‘lom turmush tarzini targ‘ib etuvchi ko‘rgazmali chiqishlar namoyish etildi. Mazkur chiqishlar tadbirga alohida ko‘tarinki kayfiyat bag‘ishlab, ishtirokchilarda katta taassurot qoldirdi.