Buxoro shahar hokimligi

Mazkur musobaqa maktab o‘quvchilari o‘rtasida tashkil etilib, unda Buxoro viloyatining turli hududlaridan 200 nafardan ortiq o‘quvchi-yoshlar ishtirok etdi. Tadbirda Buxoro shahar hokimi Qurbon Tursunov qatnashib, yoshlarning innovatsion g‘oyalarga bo‘lgan qiziqishi, texnik ijodkorligi va intellektual salohiyatini yuksaltirish borasida bunday musobaqalarning ahamiyati beqiyos ekanini ta’kidladi.

Musobaqa zamonaviy texnologik yo‘nalishlar bo‘yicha qizg‘in va murosasiz bahslar ostida o‘tdi. Bellashuvlar davomida ishtirokchilar robotlarni loyihalash va dasturlash, avtomatlashtirilgan boshqaruv tizimlari, mexanika, aerodinamika hamda jamoaviy ishlash ko‘nikmalarini amaliy tarzda namoyon etdilar. Musobaqa qatnashchilar o‘rtasida sog‘lom raqobat bilan birga o‘zaro hamkorlik va do‘stlik muhitini ham shakllantirdi. Shu bois tadbir nafaqat texnik bellashuv, balki yoshlar o‘rtasidagi do‘stlik bayrami sifatida yodda qoldi.

Tadbir yakunida g‘olib va sovrindorlar diplom, kubok va pul mukofotlari bilan taqdirlandi. Shuningdek, musobaqada qatnashgan barcha ishtirokchilarga sertifikat hamda esdalik sovg‘alari topshirildi.

Alohida e’tiborga molik jihati shundaki, ushbu formatdagi robototexnika va aviamodellashtirish musobaqasi viloyat miqyosida ilk marotaba o‘tkazildi. Bu esa viloyatda STEAM ta’limi, texnologik sport va innovatsion yo‘nalishlarni rivojlantirish, iqtidorli o‘quvchi-yoshlarni aniqlash va kelgusida yirik respublika hamda xalqaro musobaqalarga tayyorlash yo‘lida muhim qadam bo‘ldi.

Mazkur musobaqa kelgusida an’anaviy tarzda o‘tkazilishi, yoshlar uchun yangi imkoniyatlar va yuksak marralar sari mustahkam poydevor bo‘lib xizmat qilishi kutilmoqda. 4 ta yo'nalishda o'gan musobaqada quyidagi natijalar qayd etildi. "Robo Race" yo‘nalishida Ahmadjon  Istamov, "Line Follower" yo‘nalishida Shoxruxmirzo Hafizov, "Robofutbol" yo‘nalishida Shukurjon Baxshilloyev va Ozodbek Ramazonov, hamda "Rezina motorli aviamodellar" yo‘nalishida Feruz  Baxodirovlar g‘oliblikni qo‘lga kiritishdi.