Buxoro shahrida yangi shaharsozlik standartini joriy etishda muhim investision shartnoma imzolandi
2025-12-31 10:45:00 / Yangiliklar
"ROX Group" kompaniyasi raisining o'rinbosari Tran Thi My Loc xonim boshchiligidagi delegatsiya vakillari Buxoro shahrida bo'ldi. Buxoro shahri hamda Vyetnam Respublikasining yirik investision kompaniyasi “ROX Group” o‘rtasida umumiy qiymati 2 milliard AQSH dollariga teng bo‘lgan investision shartnoma tuzildi. Buxoro shahar hokimi Qurbon Tursunov hamda "ROX Group" kompaniyasining O'zbekistondagi bosh vakili Aziz Burxanov tomonidan tarixiy shartnoma imzolandi. Ushbu kelishuv doirasida Buxoro shahrida yangi shaharsozlik standartlari asosida barpo etiladigan ikkita yirik loyihaga rasman start berildi. Mazkur investision kelishuv doirasida “New Bukhara City” va “New Central Bukhara” loyihalari amalga oshiriladi.
"ROX Group" tomonidan amalga oshirilayotgan ushbu loyihalar Buxoro shahri va umumiy mintaqa rivojlanishi hamda gullab-yashnashiga katta hissa qo‘shishi kutilmoqda. Loyihalar o‘zining noyob konsepsiyasi, zamonaviy arxitektura yechimlari va kompleks yondashuvi bilan shahar qiyofasini tubdan yangilashga xizmat qiladi hamda Buxoroning investision va turizm salohiyatini yanada oshiradi. Loyihalarni amalga oshirish jarayonida qurilish va xizmat ko‘rsatish sohalarida ko‘plab imkoniyatlar yaratilib, mahalliy aholi uchun minglab yangi ish o‘rinlari paydo bo'ladi. Bu esa aholi bandligini ta’minlash va daromadlar o‘sishiga ijobiy ta’sir ko‘rsatadi.
Loyihalar doirasida muhandislik-kommunikatsiya tarmoqlari, yo‘l-transport infratuzilmasi, obodonlashtirish ishlari va ijtimoiy soha obyektlari zamonaviy talablar asosida rivojlantiriladi. “New Bukhara City” va “New Central Bukhara” loyihalari doirasida turar joy, ijtimoiy, madaniy va dam olish obyektlari barpo etilib, aholi uchun qulay, xavfsiz va zamonaviy yashash muhiti yaratiladi. Bu esa fuqarolarning umumiy hayot sifati oshishiga xizmat qiladi. Bundan tashqari, mazkur loyihalar xorijiy sayyohlar hamda qo‘shni viloyatlar aholisi o‘rtasida katta qiziqish uyg‘otib, turizm sohasining jadal rivojlanishiga, Buxoro shahrining xalqaro miqyosda tanilishi va nufuzi oshishiga munosib hissa qo‘shadi.
Umuman olganda, "ROX Group" bilan imzolangan ushbu investision shartnoma Buxoro shahrining uzoq muddatli strategik rivojlanishida muhim qadam bo‘lib, yangi shaharsozlik standartlarini joriy etish va zamonaviy urbanistik muhitni shakllantirishga qaratilgan.