Sanoat, ta’lim va innovatsiyalar yo‘lida hamkorlik
2025-12-23 19:05:00 / Yangiliklar
Mazkur tashrif O‘zbekiston va Rossiya o‘rtasidagi savdo-iqtisodiy, sanoat va ilmiy-ta’lim sohalaridagi hamkorlikni yanada mustahkamlash, zamonaviy texnologiyalarni o‘rganish hamda ularni Buxoro viloyati iqtisodiyoti va sanoatiga tatbiq etish imkoniyatlarini baholashga qaratilgan.
Tashrif dasturi doirasida delegatsiya a'zolari «ОмЗИТ» AJ tomonidan "LAVART" brendi ostida ishlab chiqarilgan va “Gazpromneft-Catalytic Systems” AJ obyektlarida muvaffaqiyatli ekspluatatsiya qilinayotgan yuqori texnologik uskunalar faoliyati bilan tanishishdi. Ushbu tashrif davomida ishlab chiqarish jarayonlari, texnologik yechimlar, energiya samaradorligi va sanoat xavfsizligi masalalariga alohida e’tibor qaratildi.
Shuningdek, “Gazpromneft-Catalytic Systems” AJ bosh direktori A.Chembulaev bilan bo‘lib o‘tgan uchrashuvda sanoat kooperatsiyasi, tajriba almashinuvi va qo‘shma loyihalarni amalga oshirish istiqbollari muhokama qilindi.
Delegatsiyaning navbatdagi manzili Omsk davlat texnika universiteti bo‘ldi. Universitet rektori Pavel Korchagin bilan o‘tkazilgan uchrashuvda oliy texnik ta’limni rivojlantirish, muhandis kadrlarini tayyorlash, ilmiy-tadqiqot ishlari hamda innovatsion ishlanmalarni ishlab chiqarishga joriy etish masalalari yuzasidan atroflicha fikr almashildi. Shuningdek, tomonlar o‘rtasida ta’lim va fan sohasida hamkorlikni yo‘lga qo‘yish, akademik almashinuv va qo‘shma ilmiy loyihalarni amalga oshirish imkoniyatlari muhokama etildi. Tashrif doirasida delegatsiya vakillari Omsk davlat texnika universitetining muhandislik markazi faoliyati bilan ham yaqindan tanishishdi.
Bugun shuningdek, «ОмЗИТ» AJ bosh direktori A.Kovalenko bilan o‘tkazilgan uchrashuvda sanoat mahsulotlarini ishlab chiqarish, texnologiyalarni mahalliylashtirish, investitsiya loyihalarini amalga oshirish va Buxoroda hududida qo‘shma ishlab chiqarish quvvatlarini tashkil etish masalalari muhokama qilindi.
Delegatsiya vakillarining Omsk viloyati gubernatori va Omsk viloyati hukumati raisi V.Xotsenko bilan muloqoti bo‘lib o‘tdi. Hududlararo hamkorlikni yanada kengaytirish, savdo-iqtisodiy aloqalarni rivojlantirish, sanoat, ta’lim va innovatsiyalar sohasida uzoq muddatli va o‘zaro manfaatli sheriklikni yo‘lga qo‘yish masalalari uchrashuv davomida muhokama qilindi.
Mazkur tashrif Buxoro viloyati va Omsk viloyati o‘rtasidagi hamkorlikni yangi bosqichga olib chiqish, ilg‘or texnologiyalarni joriy etish hamda hududlarning iqtisodiy salohiyatini oshirishga xizmat qilishi bilan ahamiyatli.