“Sitorai Mohi Xossa” mahallasida tomorqa yerlaridan unumli foydalanilmoqda
2025-11-24 10:30:00 / Yangiliklar
Salomat Jumartova 8 yildan beri uyidagi 1 sotixlik issiqxonada faoliyat yuritib kelmoqda. Issiqxonada limon, banan va mandarin kabi sitrus mevalar yetishtiriladi. U dehqonchilikning qoida va me’yorlariga qat’iy amal qilgan holda yuqori hosil olishga erishgan. So‘nggi ikki yilda uning mehnati o‘z samarasini berdi. Yiliga 500 kgdan ortiq limon, 2 tup banan va 2 tup mandarin daraxtlaridan 50 kgdan hosil yetishtirib, bundan sezilarli daromad olinayotgani buning yaqqol isbotidir. Hozirgi kunda issiqxonada limon parvarishlanmoqda. Ma'lumot o'rnida har mavsumda mahalla aholisini ta'minlash bilan birgalikda limonlar bozor rastalariga ham chiqariladi.
Ushbu ish jarayonida doimiy ravishda 3 nafar ishchi faoliyat yuritib, mavsumda ularning soni 5 nafargacha yetadi. Ishchilarga bir kunga 100 mingdan 150 ming so‘mgacha ish haqi to‘lanadi.
Tadbirkor nafaqat o‘z shaxsiy issiqxonasini rivojlantirish bilan shug‘ullanadi, balki kelgusida mahalla hududida 10 ish o‘rniga ega bo‘lgan 10 sotixlik zamonaviy issiqxona qurishni maqsad qilgan. Ushbu zamonaviy issiqxonada 20 dan ortiq ko‘chat turlari – turli ertangi va kechgi qovun, oshqovoq, qalampir ko‘chatlari yetishtirilishi rejalashtirilmoqda.